இந்திய ரசிகர்களுக்கு தீபாவளி வாழ்த்து தெரிவித்து வீடியோ வெளியிட்ட மார்வெல்

இந்திய ரசிகர்களுக்கு தீபாவளி வாழ்த்து தெரிவிக்கும் வகையில் மார்வெல் இந்தியா நிறுவனம் சிறப்பு வீடியோ ஒன்றை வெளியிட்டுள்ளது. இதில் ஹாலிவுட் நடிகர்கள் ராபர்ட் டவுனி ஜூனியர், கிறிஸ் இவான்ஸ் ஆகியோர் ரசிகர்களுக்கு வாழ்த்து தெரிவித்துள்ளனர். மார்வெல் ரசிகர்கள் பெரும் ஆவலுடன் எதிர்பார்த்துக் கொண்டிருக்கும் திரைப்படங்களில் ஒன்றாக ‘அவெஞ்சர்ஸ்: டூம்ஸ்டே’ உருவாகி வருகிறது. மார்வெல் சினிமேட்டிக் யூனிவர்ஸின் 39-வது படமாக வெளியாக உள்ள இதனை, ஏற்கெனவே ‘அவெஞ்சர்ஸ்: இன்பினிட்டி வார்’, ‘அவெஞ்சர்ஸ்: எண்ட்கேம்’ ஆகிய படங்களை இயக்கிய ரஸ்சோ சகோதரர்கள் இயக்கியுள்ளனர். இந்தப் படத்தில் ரசிகர்களிடையே மிகவும் பிரபலமான அயர்ன் மேன் கதாபாத்திரத்தில் நடித்த ராபர்ட் டவுனி ஜூனியர், தற்போது வில்லனான டாக்டர் டூம் வேடத்தில் தோன்றுகிறார். ‘அவெஞ்சர்ஸ்: எண்ட்கேம்’ படத்துடன் சில முக்கிய சூப்பர் ஹீரோக்களின் கதைகள் முடிவுக்கு வந்தன. அதன்பிறகு வெளியான திரைப்படங்கள் மற்றும் இணையத் தொடர்களில் பல புதிய சூப்பர் ஹீரோக்கள் அறிமுகப்படுத்தப்பட்டனர். இருப்பினும், அவற்றில் சில படைப்புகள் ரசிகர்களிடம் எதிர்பார்த்த அளவுக்கு வரவேற்பைப் பெறவில்லை. இந்தச் சூழலில், ‘அவெஞ்சர்ஸ்: டூம்ஸ்டே’ படத்தில் பல சூப்பர் ஹீரோக்கள் ஒன்றிணைந்து டாக்டர் டூமை எதிர்கொள்ளும் வகையில் கதை அமைந்துள்ளது.

ராபர்ட் டவுனி ஜூனியர், கிறிஸ் இவான்ஸ், கிறிஸ் ஹெம்ஸ்வொர்த், பெட்ரோ பாஸ்கல் உள்ளிட்ட பல முன்னணி நடிகர்கள் இப்படத்தில் இடம்பெற்றுள்ளனர். இதனால், இப்படத்தின் மீதான எதிர்பார்ப்பு சர்வதேச அளவில் அதிகரித்துள்ளது. இந்தியாவில் முதலில் டிசம்பர் 18-ம் தேதி வெளியாகும் என்று அறிவிக்கப்பட்டிருந்த நிலையில், தற்போது வெளியீட்டுத் தேதி மாற்றப்பட்டுள்ளது. அதன்படி, திட்டமிட்டதைவிட ஒரு நாள் முன்னதாக, டிசம்பர் 17-ம் தேதி திரைப்படம் வெளியாகும் என மார்வெல் இந்தியா தெரிவித்துள்ளது. இதற்கிடையில், இந்திய ரசிகர்களைக் கவரும் வகையில் தீபாவளி வாழ்த்துகளுடன் கூடிய வீடியோவையும் நிறுவனம் வெளியிட்டுள்ளது. அதில் ராபர்ட் டவுனி ஜூனியர் மற்றும் கிறிஸ் இவான்ஸ் ஆகியோர் இந்திய ரசிகர்களுக்குத் தங்களது வாழ்த்துகளைப் பகிர்ந்துள்ளனர். மார்வெல் திரைப்படங்களுக்கு இந்தியாவில் தொடர்ந்து நல்ல வரவேற்பு கிடைத்து வரும் நிலையில், இந்தியாவின் முக்கிய பண்டிகையான தீபாவளியை முன்னிட்டு நிறுவனம் வெளியிட்டுள்ள இந்த வாழ்த்து வீடியோ ரசிகர்களின் கவனத்தை ஈர்த்துள்ளது.