அரிசி விலை உயர்வைக் கட்டுப்படுத்த 50 லட்சம் டன் விற்பனை: பதுக்கலைத் தடுக்க தீவிர கண்காணிப்பு
நாட்டில் தொடர்ந்து அதிகரித்து வரும் அரிசி விலையைக் கட்டுப்படுத்தும் நோக்கில், மத்திய அரசு தனது கையிருப்பில் உள்ள 50 லட்சம் டன் அரிசியை திறந்த சந்தையில் விற்பனை செய்ய திட்டமிட்டுள்ளது. இதற்கிடையே, தமிழகத்தில் அரிசி மற்றும் நெல் பதுக்கலைத் தடுக்கும் வகையில் கண்காணிப்பு நடவடிக்கைகளும் தீவிரப்படுத்தப்பட்டுள்ளன. நாடு முழுவதும் அரிசியின் விலை உயர்ந்து வரும் நிலையில், தமிழகத்தில் இந்த விலை உயர்வு மற்ற மாநிலங்களைக் காட்டிலும் அதிகமாக உள்ளது. கடந்த ஆகஸ்ட் 9-ஆம் தேதி தமிழகத்தில் ஒரு கிலோ அரிசியின் சராசரி விலை ரூ.59 ஆக இருந்தது. ஆனால், கடந்த 9-ஆம் தேதி நிலவரப்படி அது ரூ.69 ஆக அதிகரித்துள்ளது. இதன் மூலம் மூன்று மாதங்களில் கிலோவுக்கு ரூ.10 உயர்வு ஏற்பட்டுள்ளது. மற்ற மாநிலங்களிலும் அரிசி விலை அதிகரித்துள்ளது. மகாராஷ்டிராவில் ஒரு கிலோ அரிசி ரூ.50-ல் இருந்து ரூ.53 ஆகவும், மேற்கு வங்காளத்தில் ரூ.43-ல் இருந்து ரூ.52 ஆகவும் உயர்ந்துள்ளது. டெல்லியில் ஒரு கிலோ அரிசி ரூ.45 என்ற விலையில் விற்பனை செய்யப்படுகிறது. தென் மாநிலங்களில் அரிசி உற்பத்தி குறைந்துள்ளதே இந்த விலை உயர்வுக்கு முக்கியக் காரணமாகக் கூறப்படுகிறது. தமிழகம், கர்நாடகம், ஆந்திரப் பிரதேசம், தெலங்கானா, கேரளம் ஆகிய மாநிலங்களில் போதிய மழையின்மை மற்றும் வறட்சி காரணமாக உற்பத்தி பாதிக்கப்பட்டுள்ளது. இதனால் சந்தைக்கு வரும் அரிசியின் அளவு குறைந்துள்ளதுடன், தேவை அதிகமாக இருப்பதும் விலை உயர்வுக்கு வழிவகுத்துள்ளது.
இந்தச் சூழலில், சந்தையில் அரிசிக்குத் தட்டுப்பாடு ஏற்படுவதைத் தவிர்த்து விலையைக் கட்டுப்படுத்த மத்திய அரசு நடவடிக்கை மேற்கொண்டுள்ளது.
