டிஜிட்டல் பணப் பரிவர்த்தனைகள் அதிகரித்து வரும் சூழலில், இந்த ஆண்டு தீபாவளி பண்டிகையின்போது ரூ.10, ரூ.20 மற்றும் ரூ.50 மதிப்பிலான ரூபாய் நோட்டுகளுக்குத் தட்டுப்பாடு ஏற்படும் என ரிசர்வ் வங்கி அறிவித்துள்ளதாக சமூக வலைத்தளங்களில் ஒரு தகவல் வேகமாகப் பரவி வருகிறது. அந்தப் பதிவில், பணப் பரிவர்த்தனைகளைக் குறைக்கும் நோக்கில் குறைந்த மதிப்பிலான ரூபாய் நோட்டுகளின் அச்சிடுதல் குறைக்கப்பட்டுள்ளதாகவும், பொதுமக்கள் யு.பி.ஐ. மூலம் பணம் செலுத்த ஊக்குவிக்கப்படுவதாகவும் குறிப்பிடப்பட்டுள்ளது. மேலும், பண்டிகைக் காலங்களில் பொருட்களை வாங்குவதற்குத் தேவையான பணத்தை முன்கூட்டியே திட்டமிட்டு வைத்துக்கொள்ளுமாறும் அறிவுறுத்தப்பட்டுள்ளதாகக் கூறப்பட்டுள்ளது.
Advertisement
ஆனால், சமூக வலைத்தளங்களில் பகிரப்படும் இந்தத் தகவல் முற்றிலும் தவறானது எனத் தெரிவிக்கப்பட்டுள்ளது. குறைந்த மதிப்பிலான ரூபாய் நோட்டுகள் தொடர்பாகவோ, தீபாவளி பண்டிகையின்போது அவற்றுக்குத் தட்டுப்பாடு ஏற்படும் என்றோ ரிசர்வ் வங்கி எந்த அறிவிப்பையும் வெளியிடவில்லை. இதனை உறுதிப்படுத்தியுள்ள மத்திய அரசின் அதிகாரப்பூர்வ தகவல் சரிபார்ப்புப் பிரிவு, சமூக வலைத்தளங்களில் பரவும் இதுபோன்ற தவறான செய்திகளை நம்ப வேண்டாம் என்றும், தகவல்களைச் சரிபார்த்த பின்னரே பகிர வேண்டும் என்றும் பொதுமக்களுக்கு எச்சரிக்கை விடுத்துள்ளது.
