மக்களவையில் பொதுத்தேர்வுகள் திருத்த மசோதா அறிமுகம்: முக்கிய அம்சங்கள் என்ன?

நீட் உள்ளிட்ட பொதுத்தேர்வுகளில் நடைபெறும் முறைகேடுகளை கட்டுப்படுத்தும் நோக்கில், பொதுத்தேர்வுகள் சட்டத் திருத்த மசோதா மக்களவையில் அறிமுகப்படுத்தப்பட்டது. எதிர்க்கட்சிகள் கடும் அமளியில் ஈடுபட்டிருந்த சூழலில், மத்திய அமைச்சர் ஜிதேந்திர சிங் இந்த மசோதாவை அவையில் தாக்கல் செய்தார்.வினாத்தாள் கசிவு மற்றும் தேர்வுகள் தொடர்பான மோசடிகளில் ஈடுபடுவோருக்கு கடுமையான தண்டனைகளை வழங்கும் வகையில் சட்டத்தில் திருத்தம் மேற்கொள்ளப்படுகிறது. குற்றத்தின் தீவிரத்தைப் பொறுத்து அதிகபட்சமாக 10 ஆண்டுகள் வரை சிறைத்தண்டனை வழங்க வழிவகை செய்யப்பட்டுள்ளது. திட்டமிட்டு முறைகேட்டில் ஈடுபடுபவர்களுக்கு குறைந்தபட்சம் 7 ஆண்டுகள் சிறைத்தண்டனையும், ரூ.10 கோடி வரை அபராதமும் விதிக்கப்படும் என மசோதாவில் குறிப்பிடப்பட்டுள்ளது.மேலும், இந்தச் சட்டத்தின் கீழ் தொடரப்படும் மேல்முறையீட்டு வழக்குகள் மூன்று மாதங்களுக்குள் முடிக்கப்பட வேண்டும் என்பதுடன், விதிமீறலில் ஈடுபடும் நிறுவனங்களுக்கு பொதுத்தேர்வுகளை நடத்த விதிக்கப்படும் தடை காலம் தற்போதையதை விட உயர்த்தப்பட்டு 8 ஆண்டுகளாக நிர்ணயிக்கப்படும் என்பதும் மசோதாவின் முக்கிய அம்சங்களில் ஒன்றாகும்.இதற்கிடையில், மாணவர்களுக்கு எதிரான தாக்குதல்களை கண்டித்தும், அதுகுறித்து மத்திய அரசு விளக்கம் அளிக்க வேண்டும் என்றும் வலியுறுத்தி, நாடாளுமன்றத்தின் இரு அவைகளிலும் எதிர்க்கட்சிகள் தொடர்ந்து அமளியில் ஈடுபட்டன. அந்த சூழலிலேயே இந்த மசோதா அறிமுகப்படுத்தப்பட்டது.இதற்கு முன்பு நாடாளுமன்ற விவகாரத்துறை மத்திய அமைச்சர் கிரண் ரிஜிஜு, பொதுத்தேர்வுகள் (முறைகேடுகளைத் தடுக்கும்) திருத்த மசோதா, 2026-க்கு அனைத்து அரசியல் கட்சிகளும் முன்னுரிமை வழங்க வேண்டிய முக்கியமான சட்ட முன்வரைவாகும் என்று தெரிவித்திருந்தார்.வினாத்தாள் கசிவில் ஈடுபடுபவர்களுக்கு கடுமையான தண்டனையை உறுதி செய்வதோடு, மாணவர்களின் எதிர்காலத்தை பாதுகாக்கும் நோக்கத்திலும் இந்த மசோதா முக்கியத்துவம் பெறுகிறது என்றும் அவர் கூறினார். தற்போதைய சூழலில் இதுவே நாடாளுமன்றத்தின் முதன்மை விவாதப் பொருளாக இருக்க வேண்டும்; வேறு விவகாரங்கள் மூலம் கவனத்தை திசைதிருப்பக் கூடாது என்றும் அவர் வலியுறுத்தினார்.எதிர்க்கட்சிகளின் விமர்சனங்களை நிராகரித்த கிரண் ரிஜிஜு, இந்த மசோதாவை எந்த நிலையிலும் நிறைவேற்ற அரசு உறுதியாக இருப்பதாக தெரிவித்தார். இந்தச் சட்டம் அமலுக்கு வந்தால் வினாத்தாள் கசிவில் ஈடுபடுவோருக்கு மிகக் கடுமையான தண்டனை வழங்கப்படும் என்றும், பிரதமர் நரேந்திர மோடி அறிவித்துள்ள தேர்வு சீர்திருத்த நடவடிக்கைகளின் முக்கிய அங்கமாக இந்த மசோதா அமையும் என்றும் அவர் கூறினார்.