நீட் வேண்டாம் என்ற மாணவர்களின் குரல் நாடு முழுவதும் எதிரொலிக்கிறது" - கனிமொழி எம்.பி

நீட் தேர்வு வினாத்தாள் கசிவு விவகாரத்தைத் தொடர்ந்து, மருத்துவப் படிப்புக்கான சேர்க்கை முறையில் வெளிப்படைத்தன்மை குறித்து நாடு முழுவதும் மாணவர்கள் அதிருப்தி தெரிவித்து வருகின்றனர். இதற்குப் பொறுப்பேற்று மத்திய கல்வி அமைச்சர் தர்மேந்திர பிரதான் பதவி விலக வேண்டும் என்ற கோரிக்கையுடன், டெல்லி ஜந்தர் மந்தரில் மாணவர்கள் மற்றும் இளைஞர்கள் கடந்த ஜூன் 6 முதல் தொடர் போராட்டத்தில் ஈடுபட்டு வருகின்றனர். நாளுக்கு நாள் இந்தப் போராட்டத்திற்கு ஆதரவு அதிகரித்து வரும் நிலையில், பல்வேறு மாணவர் அமைப்புகளும் தங்களது ஒற்றுமையை வெளிப்படுத்தியுள்ளன.இந்தச் சூழலில், சென்னை பாலன் இல்லத்தில் நீட் தேர்வுக்கு எதிராகப் போராடி வரும் மாணவர்களை திமுக துணைப் பொதுச்செயலாளரும், நாடாளுமன்ற திமுக குழுத் தலைவருமான கனிமொழி எம்.பி. நேரில் சந்தித்து ஆதரவு தெரிவித்தார்.அப்போது பேசிய அவர், ஒன்றிய அரசை எதிர்த்து மாணவர்கள் துணிச்சலுடன் போராடுவது பாராட்டுக்குரியது என்றும், அவர்களின் போராட்டம் நாட்டின் இளைஞர்களுக்கு வழிகாட்டியாக மாறியுள்ளதாகவும் கூறினார். அதிகாரத்தில் இருப்பவர்களை யாராலும் கேள்வி கேட்க முடியாது என்ற நிலையை மாணவர்கள் மாற்றியிருப்பது இந்தப் போராட்டத்தின் மிகப்பெரிய வெற்றி என அவர் குறிப்பிட்டார்.நாடாளுமன்றத்தில் எதிர்க்கட்சியினருக்கு ஏற்பட்ட நடவடிக்கைகளையும் நினைவுகூர்ந்த கனிமொழி, மாணவர்களின் தொடர் போராட்டத்தால் மத்திய அரசு டெல்லி ஜந்தர் மந்தரில் போராடுவோருடன் பேச்சுவார்த்தை நடத்தும் நிலைக்கு வந்திருப்பது குறிப்பிடத்தக்க மாற்றம் என்றார்.நீட் தேர்வுக்கு எதிரான முதல் குரல் தமிழ்நாட்டிலிருந்தே எழுந்தது என்றும், மாணவி அனிதா இந்த விவகாரத்தில் நீதிமன்றத்தை நாடியதை சுட்டிக்காட்டிய அவர், தமிழ்நாட்டில் தொடங்கிய எதிர்ப்பு தற்போது நாடு முழுவதும் பரவி வருவதாக தெரிவித்தார். டெல்லியைத் தாண்டி பல்வேறு மாநிலங்களிலும் மாணவர்கள் நீட் தேர்வுக்கு எதிராகக் குரல் கொடுத்து வருவதாகவும் கூறினார்.நீட் தேர்வு வினாத்தாள் கசிவு சம்பவம் தேர்வின் நம்பகத்தன்மையை கேள்விக்குறியாக்கியுள்ளதாகவும், பள்ளிக் கல்வியில் கற்பிக்கப்படுவது மற்றும் நீட் தேர்வில் கேட்கப்படும் கேள்விகள் இடையே வேறுபாடு இருப்பதாக மாணவர்கள் முன்வைக்கும் கருத்தையும் அவர் எடுத்துரைத்தார்.நீட் அமலுக்கு வருவதற்கு முன்பே தமிழ்நாட்டில் படித்த மருத்துவர்கள் உலகின் பல்வேறு நாடுகளிலும் முன்னணி மருத்துவமனைகளிலும் சிறப்பாக பணியாற்றி வருவதாகக் குறிப்பிட்ட அவர், அவர்கள் யாரும் நீட் தேர்வு எழுதாமல் மருத்துவர்களாக உருவானவர்கள் என்றார். அக்காலத்தில் மருத்துவத் துறையில் ஆர்வமுள்ள மாணவர்கள் தங்கள் திறமையின் அடிப்படையில் முன்னேறியதாகவும் அவர் தெரிவித்தார்.தற்போதைய நீட் முறை, பயிற்சி மையங்களுக்கு செல்லும் பொருளாதார வசதி உள்ள மாணவர்களுக்கு அதிக வாய்ப்பை உருவாக்குகிறது என்றும், அதனால் சமூக நீதி பாதிக்கப்படுவதாகவும் கனிமொழி குற்றம்சாட்டினார். இதனால்தான் நீட் தேர்வை ரத்து செய்ய வேண்டும் என்ற கோரிக்கையை தொடர்ந்து வலியுறுத்தி வருவதாகவும் கூறினார்.டெல்லியில் நடைபெறும் போராட்டத்தில் நீட் தேர்வை முறையாக நடத்த வேண்டும் என்ற கோரிக்கை முன்வைக்கப்பட்டாலும், தமிழ்நாட்டின் நிலைப்பாடு நீட் தேர்வே தேவையில்லை என்பதாகும் என அவர் விளக்கினார். மத்திய அரசு மாணவர்களின் கோரிக்கையை ஏற்று பேச்சுவார்த்தை நடத்தத் தொடங்கியிருப்பதால், அவர்களின் கோரிக்கைகளுக்கும் உரிய தீர்வு கிடைக்கும் என்ற நம்பிக்கை இருப்பதாக தெரிவித்தார்.இந்தி திணிப்புக்கு எதிராக தமிழ்நாடு முதலில் எழுப்பிய குரல் பின்னர் பிற மாநிலங்களிலும் எதிரொலித்ததைப் போலவே, நீட் எதிர்ப்பும் நாடு முழுவதும் பரவி வருவதாக கனிமொழி கூறினார். திமுக ஆட்சியில் நீட் விலக்கு தொடர்பாக சட்டமன்றத்தில் சட்டம் நிறைவேற்றப்பட்டதையும், அதற்கு ஆளுநர் ஒப்புதல் அளிக்க தாமதமானதையும் அவர் நினைவுகூர்ந்தார்.மாணவர்களின் உணர்வுகளை மத்திய அரசு புரிந்துகொண்டு நீட் குறித்து மறுபரிசீலனை செய்ய வேண்டும் என்றும், அவ்வாறு நடக்காவிட்டால் தமிழ்நாடு தொடர்ந்து தனது எதிர்ப்பை வெளிப்படுத்தும் என்றும் அவர் தெரிவித்தார்.டெல்லியில் போராடும் மாணவர்கள் மீது தடியடி நடத்தப்பட்டதாகவும், குறிப்பாக பெண் மாணவர்கள் காவல்துறையைக் கண்டு அச்சப்படுவதாக சமூக வலைதளங்களில் பகிர்ந்து வருவது கவலைக்குரியது என்றும் கனிமொழி கூறினார். தண்ணீர் பீய்ச்சுதல் உள்ளிட்ட நடவடிக்கைகளையும் பொருட்படுத்தாமல் மாணவர்கள் உறுதியுடன் போராட்டத்தைத் தொடர்வது அவர்களின் மனவலிமையை காட்டுவதாக அவர் பாராட்டினார்.மத்திய அரசு மாணவர்களுடன் பேச்சுவார்த்தை நடத்தும் நிலைக்கு வந்திருப்பதே போராட்டத்தின் மிகப்பெரிய வெற்றி என்றும், அதற்காக போராடும் இளைஞர்களுக்கு தனது வாழ்த்துகளைத் தெரிவித்தார்.தமிழ்நாட்டிலும் மாணவர்கள் நீட் எதிர்ப்பு போராட்டங்களை முன்னெடுக்கும்போது பல்வேறு கட்டுப்பாடுகள் விதிக்கப்படுவதாகவும், குறிப்பாக மதுரையில் போராடிய மாணவர்கள் தாக்கப்பட்டதாகவும் அவர் குற்றம்சாட்டினார். போராட்டங்களுக்கு உரிய இடம் வழங்கப்படாமல் இருப்பதாகவும் அவர் கூறினார்.மாணவர்களின் நியாயமான கோரிக்கைகளுக்கு தமிழக அரசு முழுமையான ஆதரவு வழங்க வேண்டும் என்றும், மாணவர்கள் எங்கு போராடினாலும் திமுகவும் தானும் அவர்களுடன் தொடர்ந்து இருப்போம் என்றும் கனிமொழி உறுதியளித்தார். இறுதியாக, போராட்டத்தில் ஈடுபட்டுள்ள அனைத்து மாணவர்கள் மற்றும் இளம் பெண்களுக்கும் வாழ்த்து தெரிவித்த அவர், அவர்களின் போராட்டம் வெற்றி பெறும் என்ற நம்பிக்கையை வெளிப்படுத்தினார்.