டெல்லியில் போராட்டத்தில் ஈடுபட்ட இளைஞர்கள் மற்றும் மாணவர்கள் மீது போலீசார் நடத்தியதாகக் கூறப்படும் தாக்குதலைக் கண்டித்து, திருவாரூர் மாவட்டம் மன்னார்குடியில் கல்லூரி மாணவர்கள் வகுப்புகளை புறக்கணித்து ஆர்ப்பாட்டத்தில் ஈடுபட்டனர். நீட் தேர்வு முறைகேடு உள்ளிட்ட பல்வேறு கோரிக்கைகளை முன்வைத்து டெல்லியில் நடைபெற்ற போராட்டத்தின் போது, போலீசார் கண்ணீர்ப்புகைக் குண்டுகள் வீசியதுடன் தடியடியும் நடத்தியதாக தகவல்கள் வெளியாகியுள்ளன. இதற்கு எதிர்ப்பு தெரிவித்து மாநிலத்தின் பல பகுதிகளில் மாணவர்கள் போராட்டங்களை முன்னெடுத்து வருகின்றனர். அதன் தொடர்ச்சியாக, மன்னார்குடி மற்றும் சுற்றுவட்டார பகுதிகளில் உள்ள பல்வேறு கல்லூரிகளைச் சேர்ந்த நூற்றுக்கணக்கான மாணவர்கள் வெள்ளிக்கிழமை காலை முதலே வகுப்புகளை புறக்கணித்தனர்.
Advertisement
பின்னர் கல்லூரி வளாகங்களுக்கு வெளியே திரண்ட அவர்கள், டெல்லி போலீசாருக்கு எதிராகவும், மாணவர்களின் உரிமைகள் மற்றும் நலனை பாதுகாக்க வேண்டும் என்றும் வலியுறுத்தி முழக்கங்கள் எழுப்பினர்.மாணவர் அமைப்புகள் அறிவித்திருந்த நாடு தழுவிய போராட்டத்தின் ஒரு பகுதியாக இந்த ஆர்ப்பாட்டம் நடைபெற்றதாக தெரிவிக்கப்பட்டுள்ளது. இந்த போராட்டத்தை முன்னிட்டு மன்னார்குடி கல்வி நிறுவனங்கள் அமைந்துள்ள பகுதிகளில் பாதுகாப்பு நடவடிக்கையாக ஏராளமான போலீசார் குவிக்கப்பட்டனர்.
