நடிகர் விஜய்யின் மகன் ஜேசன் சஞ்சய் இயக்குநராக அறிமுகமாகும் திரைப்படம் ‘சிக்மா’. லைகா புரொடக்ஷன்ஸ் மற்றும் ஜேஎஸ்ஜே மீடியா இணைந்து தயாரிக்கும் இப்படத்தில் சந்தீப் கிஷன் கதாநாயகனாக நடித்துள்ளார். தமன் இசையமைத்துள்ளார். பரியா அப்துல்லா, ராஜூ சுந்தரம், அன்புதாசன், யோக் ஜாபி, சம்பத் ராஜ், கிரண் கொண்டா, மகாலட்சுமி சுதர்சனன் உள்ளிட்டோர் முக்கிய கதாபாத்திரங்களில் நடித்துள்ளனர். நடிகை கேத்ரின் தெரசா, படத்தில் இடம்பெறும் உற்சாகமான பாடல் ஒன்றில் சிறப்புத் தோற்றத்தில் நடித்துள்ளார். ஆக்ஷன், சாகசம் மற்றும் நகைச்சுவையை மையமாகக் கொண்டு உருவாகியுள்ள இப்படத்தின் டிரெய்லர், இயக்குநர் ராஜமவுலிக்கு படக்குழுவினரால் திரையிட்டுக் காட்டப்பட்டது. டிரெய்லரைப் பார்த்த ராஜமவுலி, ‘சிக்மா’ திரைப்படம் தொடக்கம் முதல் இறுதி வரை ரசிக்க வைக்கும் வகையில் இருப்பதாக தெரிவித்துள்ளார்.
Advertisement
குறிப்பாக படத்தில் பொழுதுபோக்கு அம்சங்களுடன் பல்வேறு சாகச காட்சிகளும், இளம் தலைமுறையினரை கவரும் வகையிலான ஆக்ஷன் காட்சிகளும் இடம்பெற்றுள்ளதாக அவர் கூறியுள்ளார். மேலும், இந்த திரைப்படம் பார்ப்பதற்கு சிறப்பாக இருப்பதாக குறிப்பிட்ட ராஜமவுலி, இதில் நடித்துள்ள பல முக்கிய நடிகர்களும் தங்களது பங்களிப்பை சிறப்பாக வழங்கியுள்ளதாக பாராட்டினார். ‘சிக்மா’ ஒரு சுவாரஸ்யமான சாகச அனுபவத்தை ரசிகர்களுக்கு வழங்கும் என்றும் அவர் தெரிவித்துள்ளார். ‘சிக்மா’ திரைப்படம் அக்டோபர் 2-ம் தேதி திரையரங்குகளில் வெளியாக உள்ளது.
