காவலர் வீரவணக்க நாளை முன்னிட்டு, நாட்டின் பாதுகாப்புக்காகத் தன்னலமின்றிப் பணியாற்றும் காவல் துறையினரின் சேவையைப் பாராட்டி முதல்வர் விஜய் தனது வாழ்த்துகளையும் வீர வணக்கத்தையும் தெரிவித்துள்ளார். இதுகுறித்து அவர் வெளியிட்டுள்ள பதிவில், 1959-ம் ஆண்டு லடாக் எல்லைப் பகுதியில் தாய்நாட்டைக் காக்கும் பணியில் ஈடுபட்டிருந்தபோது வீரமரணமடைந்த மத்திய ரிசர்வ் காவல் படையைச் சேர்ந்த 10 வீரர்களின் தியாகத்தை நினைவுகூர்ந்துள்ளார். அவர்களின் தியாகத்தைப் போற்றும் காவலர் வீரவணக்க நாளில், நாட்டில் அமைதியையும் சட்டம்-ஒழுங்கையும் பாதுகாக்கும் பணியில் உயிர்நீத்த அனைத்து காவலர்களுக்கும் மரியாதை செலுத்துவதாகக் குறிப்பிட்டுள்ளார்.
Advertisement
மேலும், இயற்கைப் பேரிடர்கள், விபத்துகள், குற்றச் சம்பவங்கள் மற்றும் பொதுமக்களின் பாதுகாப்புக்கு அச்சுறுத்தல் ஏற்படும் பல்வேறு சூழல்களில், துணிச்சலுடனும் விழிப்புணர்வுடனும் காவலர்கள் செயல்பட்டு வருவதாக அவர் பாராட்டியுள்ளார். அவர்களின் அர்ப்பணிப்பும் கடமை உணர்வும் போற்றத்தக்கவை என்றும் தெரிவித்துள்ளார். கடமையாற்றும் போது உயிர்த் தியாகம் செய்த காவலர்களுக்கு தலைவணங்கி அஞ்சலி செலுத்துவோம் என்றும், நேரம் காலம் பாராமல் இடையறாது உழைத்து நாட்டின் பாதுகாப்பு அரணாக விளங்கும் காவல் துறையினரின் உயரிய பணிகளை அனைவரும் மதித்துப் போற்றுவோம் என்றும் முதல்வர் விஜய் தனது பதிவில் வலியுறுத்தியுள்ளார்.
