இருதரப்பு முதலீட்டு ஒப்பந்த புதிய கட்டமைப்புக்கு விரைவில் ஒப்புதல் - நிர்மலா சீதாராமன்

புதிய முறையில் உருவாக்கப்பட்டுள்ள இருதரப்பு முதலீட்டு ஒப்பந்த கட்டமைப்புக்கு மத்திய மந்திரிசபை விரைவில் ஒப்புதல் அளிக்கும் என்று எதிர்பார்ப்பதாக மத்திய நிதி மந்திரி நிர்மலா சீதாராமன் தெரிவித்துள்ளார்.

இந்தியா பல்வேறு நாடுகளுடன் இருதரப்பு முதலீட்டு ஒப்பந்தங்களை மேற்கொண்டு வருகிறது. இரு நாடுகளின் முதலீட்டாளர்கள் பரஸ்பரம் மற்றொரு நாட்டில் மேற்கொள்ளும் முதலீடுகளை ஊக்குவிப்பதுடன், அவற்றுக்கு பாதுகாப்பு அளிப்பதும் இந்த ஒப்பந்தங்களின் முக்கிய நோக்கமாகும்.

வெளிநாடுகளுடனான முதலீட்டு ஒப்பந்தங்களுக்கான விதிமுறைகள் அவ்வப்போது மறுஆய்வு செய்யப்பட்டு, இரு தரப்பினரின் நலன்களுக்கு ஏற்ற வகையிலும், வர்த்தக நடைமுறைகளை எளிதாக்கும் வகையிலும் மாற்றியமைக்கப்பட்டு வருகின்றன.

இந்தியாவின் தற்போதைய இருதரப்பு முதலீட்டு ஒப்பந்தங்கள், கடந்த 2016-ம் ஆண்டு உருவாக்கப்பட்ட மாதிரி ஒப்பந்த கட்டமைப்பின் அடிப்படையில் மேற்கொள்ளப்பட்டு வருகின்றன. இதில் சில குறைபாடுகள் இருப்பது கண்டறியப்பட்டதைத் தொடர்ந்து, புதிய கட்டமைப்பு தயாரிக்கப்பட்டுள்ளது. இதற்கு விரைவில் மத்திய மந்திரிசபை ஒப்புதல் வழங்கும் என்று நிர்மலா சீதாராமன் கூறியுள்ளார்.

டெல்லியில் நடைபெற்ற முனிச் பாதுகாப்பு மாநாட்டில் பேசிய அவர், புதிய இருதரப்பு முதலீட்டு ஒப்பந்த கட்டமைப்பு தயாராக இருப்பதாகவும், அதற்கு விரைவில் ஒப்புதல் கிடைக்கும் என்றும் தெரிவித்தார். அதுவரை முதலீட்டு ஒப்பந்தங்கள் தொடர்பான நடவடிக்கைகள் நிறுத்தப்படவில்லை என்றும் அவர் கூறினார்.

புதிய கட்டமைப்பில் இடம்பெற்றுள்ள அம்சங்களை அடிப்படையாகக் கொண்டு பல்வேறு நாடுகளுடன் இந்தியா பேச்சுவார்த்தை நடத்தி வருகிறது. இதன் அடிப்படையில் சவுதி அரேபியாவுடன் முதலீட்டு ஒப்பந்தம் மேற்கொள்ளப்பட்டுள்ளதாகவும், அமீரகம், ஓமன் மற்றும் சில மத்திய ஆசிய நாடுகளுடனான ஒப்பந்தங்களும் இறுதி செய்யப்பட்டுள்ளதாகவும் அவர் தெரிவித்தார்.

கனடா, ரஷியா உள்ளிட்ட மேலும் பல நாடுகளுடன் இருதரப்பு முதலீட்டு பாதுகாப்பு ஒப்பந்தங்களை மேற்கொள்வது தொடர்பாக பேச்சுவார்த்தைகள் நடைபெற்று வருகின்றன. பேச்சுவார்த்தைகள் திட்டமிட்டபடி முன்னேறினால், டிசம்பருக்குள் 3 நாடுகளுடன் ஒப்பந்தங்கள் இறுதி செய்யப்படும் என எதிர்பார்ப்பதாகவும் நிர்மலா சீதாராமன் கூறினார்.

சுமார் 12 ஆண்டுகளாக உருவாக்கப்பட்டு வரும் இந்த புதிய கட்டமைப்பு, 2016-ல் அங்கீகரிக்கப்பட்ட மாதிரி ஒப்பந்தத்தில் காணப்பட்ட குறைபாடுகளை சரிசெய்வதுடன், இரு தரப்பு முதலீட்டாளர்களுக்கும் உரிய பாதுகாப்பை உறுதி செய்வதை நோக்கமாகக் கொண்டுள்ளது.

இதனிடையே, இந்தியா-அமெரிக்கா இடையிலான வர்த்தக ஒப்பந்தம் தொடர்பான பேச்சுவார்த்தைகளும் தொடர்ந்து நடைபெற்று வருகின்றன. இந்த பேச்சுவார்த்தைகள் சவாலானதாகவும், தீவிரமான முறையிலும் நடைபெற்று வருவதாகவும் நிதி மந்திரி தெரிவித்தார்.