இந்திய மகளிர் கிரிக்கெட் அணியின் முன்னணி வீராங்கனைகளில் ஒருவரான பூனம் ராவத், சர்வதேச கிரிக்கெட்டின் அனைத்து வகைப் போட்டிகளிலிருந்தும் ஓய்வு பெறுவதாக அறிவித்துள்ளார். கடந்த 2009-ம் ஆண்டு இந்திய அணிக்காக சர்வதேசப் போட்டிகளில் அறிமுகமான பூனம் ராவத், 2021-ம் ஆண்டு தனது கடைசி சர்வதேசப் போட்டியில் பங்கேற்றார். மொத்தம் 12 ஆண்டுகள் நீடித்த அவரது சர்வதேச கிரிக்கெட் வாழ்க்கையில், 4 டெஸ்ட் போட்டிகளில் 264 ரன்களும், 73 ஒருநாள் போட்டிகளில் 2,299 ரன்களும், 35 டி20 போட்டிகளில் 719 ரன்களும் எடுத்துள்ளார். குறிப்பாக, 2017-ம் ஆண்டு மகளிர் உலகக்கோப்பையில் இந்திய அணி இறுதிப்போட்டி வரை முன்னேறுவதற்கு பூனம் ராவத்தின் பங்களிப்பு முக்கியமானதாக அமைந்தது.
Advertisement
அந்தத் தொடரில் அயர்லாந்துக்கு எதிராக அவர் 109 ரன்கள் குவித்தார். மேலும், தீப்தி சர்மாவுடன் இணைந்து ஒருநாள் கிரிக்கெட்டில் 320 ரன்கள் கொண்ட தொடக்கக் கூட்டணியை அமைத்து சாதனை படைத்தார். இந்திய அணிக்காக விளையாடியது தனது வாழ்க்கையில் கிடைத்த மிகப்பெரிய பெருமை எனத் தெரிவித்துள்ள பூனம் ராவத், கிரிக்கெட் தனக்கு தனித்த அடையாளத்தையும் வாழ்நாள் முழுவதும் நினைவில் நிற்கும் அனுபவங்களையும் அளித்ததாகக் குறிப்பிட்டுள்ளார். சர்வதேசப் போட்டிகளில் இருந்து விடைபெற்றாலும், கிரிக்கெட் விளையாட்டின் எதிர்கால வளர்ச்சிக்குத் தன்னால் இயன்ற பங்களிப்பை வழங்க விரும்புவதாகவும் அவர் தெரிவித்துள்ளார்.
