‘ரணபாலி’ திரைப்படத்தில் தான் ஏற்று நடித்த ஜெயம்மா கதாபாத்திரத்தால் ஈர்க்கப்பட்ட நடிகை ராஷ்மிகா மந்தனா, 400 ஏழைக் குடும்பங்களுக்கு அத்தியாவசிய மளிகைப் பொருட்களை வழங்கி உதவியுள்ளார். மேலும், இந்த உதவித் திட்டத்தை அடுத்த ஓராண்டுக்கும் தொடர அவர் திட்டமிட்டுள்ளதாகத் தெரிவிக்கப்பட்டுள்ளது. தெலுங்குத் திரையுலகில் முன்னணி நடிகர்களாகத் திகழும் விஜய் தேவரகொண்டா, ராஷ்மிகா மந்தனா இருவரும் ஏற்கெனவே ‘கீதா கோவிந்தம்’, ‘டியர் காம்ரேட்’ ஆகிய படங்களில் இணைந்து நடித்துள்ளனர். தற்போது மூன்றாவது முறையாக ‘ரணபாலி’ திரைப்படத்தில் இருவரும் இணைந்துள்ளனர். ராகுல் சங்கிரித்யன் இயக்கத்தில் உருவாகியுள்ள இப்படத்தில், விஜய் தேவரகொண்டா ரணபாலி என்ற போராளியாகவும், ராஷ்மிகா மந்தனா அவரது மனைவி ஜெயம்மாவாகவும் நடித்துள்ளனர். ஆங்கிலேயர் ஆட்சிக் காலத்தில் சென்னை மாகாணத்தில் நிலவிய கடுமையான பஞ்சத்தின் பின்னணியில், உண்மைச் சம்பவங்களை அடிப்படையாகக் கொண்டு இப்படம் உருவாக்கப்பட்டுள்ளது. மைத்ரி மூவி மேக்கர்ஸ் மற்றும் டி-சீரிஸ் நிறுவனங்கள் இணைந்து தயாரிக்கும் இந்தப் படத்திற்கு அஜய் - அதுல் இசையமைத்துள்ளனர். 400 குடும்பங்களுக்கு மூன்று மாதங்களுக்கான மளிகைப் பொருட்கள் ‘ரணபாலி’ படத்தில் ஜெயம்மாவாக நடித்த அனுபவம் தன்னிடம் ஏற்படுத்திய தாக்கத்தின் காரணமாக, சமூக நலன் சார்ந்த உதவியில் ராஷ்மிகா மந்தனா ஈடுபட்டுள்ளார்.
Advertisement
இதன் ஒரு பகுதியாக, 400 ஏழைக் குடும்பங்களுக்குத் தேவையான மூன்று மாதங்களுக்கான மளிகைப் பொருட்களை அவர் வழங்கியுள்ளார். இந்த உதவியில் அரிசி, கோதுமை மாவு, கேழ்வரகு உள்ளிட்ட 12 வகையான அத்தியாவசியப் பொருட்கள் இடம்பெற்றுள்ளன. மேலும், இந்த முயற்சியை அடுத்த ஓராண்டுக்கு தொடர்ந்து செயல்படுத்தவும் திட்டமிடப்பட்டுள்ளது. இதன் மூலம், குடும்பங்கள் அத்தியாவசிய உணவுப் பொருட்களை வாங்குவதற்குச் செலவிடும் பணத்தைச் சேமித்து, கல்வி உள்ளிட்ட பிற தேவைகளுக்குப் பயன்படுத்திக்கொள்ள முடியும் என ராஷ்மிகா நம்பிக்கை தெரிவித்துள்ளார். சிறிய உதவியும் பெரிய மாற்றத்தை ஏற்படுத்தும்! தனது இந்த முயற்சி குறித்து ராஷ்மிகா மந்தனா கூறுகையில், உதவி செய்வதற்கு அதிகப் பணமோ, மிகப்பெரிய முயற்சியோ அவசியமில்லை என்றும், சிறிய அளவிலான உதவிகூட ஒருவரின் வாழ்க்கையில் நல்ல மாற்றத்தை உருவாக்கும் என்றும் தெரிவித்துள்ளார். தனது செயல் மற்றவர்களிடமும் பிறருக்கு உதவ வேண்டும் என்ற எண்ணத்தைத் தூண்டினால் மகிழ்ச்சி அடைவதாகவும் அவர் குறிப்பிட்டுள்ளார். திரையில் ஏற்ற கதாபாத்திரம் ஏற்படுத்திய தாக்கத்தை நிஜ வாழ்க்கையிலும் செயல்படுத்தி, நூற்றுக்கணக்கான ஏழைக் குடும்பங்களுக்குத் தேவையான அத்தியாவசியப் பொருட்களை வழங்கியுள்ள ராஷ்மிகா மந்தனின் இந்த முயற்சி கவனம் பெற்றுள்ளது.
