சென்னை வண்டலூரில் செயல்பட்டு வரும் அறிஞர் அண்ணா உயிரியல் பூங்காவில் சிங்கம் மற்றும் மான்களை பார்வையிடுவதற்கான சவாரி வசதி வரும் 14ம் தேதி வரை தற்காலிகமாக நிறுத்தப்படுவதாக தெரிவிக்கப்பட்டுள்ளது. சுமார் 1,260 ஏக்கர் பரப்பளவில் அமைந்துள்ள இந்த உயிரியல் பூங்காவில் 150-க்கும் அதிகமான இனங்களைச் சேர்ந்த ஆயிரக்கணக்கான விலங்குகள், பறவைகள் மற்றும் ஊர்வனங்கள் பராமரிக்கப்பட்டு வருகின்றன. குறிப்பாக முதலை, பாம்பு, ஆமை உள்ளிட்ட பல்வேறு ஊர்வன இனங்களும் இங்கு காட்சிப்படுத்தப்பட்டுள்ளன. ஆண்டுதோறும் லட்சக்கணக்கான சுற்றுலாப் பயணிகள் வண்டலூர் உயிரியல் பூங்காவுக்கு வருகை தருகின்றனர்.
Advertisement
பொழுதுபோக்கு மட்டுமின்றி, விலங்குகள் மற்றும் அவற்றின் வாழ்வியல் குறித்து அறிந்துகொள்ளும் கல்வி மையமாகவும் இது விளங்கி வருகிறது. பூங்காவில் பாதுகாப்பான வாகனங்கள் மூலம் சிங்கம், புலி உள்ளிட்ட விலங்குகளை அருகில் இருந்து பார்வையிடும் சவாரி வசதியும் உள்ளது. இந்த நிலையில், சிங்கம் மற்றும் மான்களை பார்வையிடுவதற்கான சவாரி சேவை தற்காலிகமாக நிறுத்தப்பட்டுள்ளது. பராமரிப்பு பணிகள் நிறைவடைந்த பிறகு இந்த சேவை மீண்டும் தொடங்கும் என தெரிவிக்கப்பட்டுள்ளது.
