நடிகர் பிரபாஸின் பிறந்தநாளை முன்னிட்டு, அவர் நடிக்கும் ‘சலார் 2’ திரைப்படத்தின் படப்பிடிப்பு 2027-ம் ஆண்டு ஜூன் மாதம் தொடங்கும் என இயக்குநர் பிரசாந்த் நீல் அறிவித்துள்ளார். இந்தத் தகவல் ரசிகர்களிடையே படத்தின் மீதான எதிர்பார்ப்பை அதிகரித்துள்ளது. ‘பாகுபலி’ திரைப்படத்தின் மூலம் இந்திய அளவில் பெரும் புகழ்பெற்றவர் நடிகர் பிரபாஸ். தற்போது, ‘சீதா ராமம்’ படத்தை இயக்கிய ஹனு ராகவபுடி இயக்கத்தில் ‘பவுசி’ (Fauzi) திரைப்படத்தில் நடித்து வருகிறார். இரண்டு பாகங்களாக உருவாகும் இப்படத்தில் இமான்வி, அனுபம் கெர், மிதுன் சக்கரவர்த்தி, ஜெயப்பிரதா உள்ளிட்டோர் முக்கிய கதாபாத்திரங்களில் நடிக்கின்றனர். மைத்ரி மூவி மேக்கர்ஸ் மற்றும் டி-சீரிஸ் நிறுவனங்கள் இணைந்து தயாரிக்கும் இப்படத்திற்கு சுதீப் சட்டர்ஜி ஒளிப்பதிவு செய்கிறார். விஷால் சந்திரசேகர் இசையமைக்கிறார். அதிக பொருட்செலவில் உருவாகும் இந்தப் படத்தில் அதிரடி சண்டைக் காட்சிகளுடன் காதல் உணர்வுகளுக்கும் முக்கியத்துவம் அளிக்கப்பட்டுள்ளது. இதில் பிரபாஸ் வித்தியாசமான தோற்றத்தில் நடிப்பது ரசிகர்களின் ஆர்வத்தை மேலும் அதிகரித்துள்ளது.
Advertisement
இப்படம் அடுத்த ஆண்டு மார்ச் 19-ம் தேதி வெளியாகும் என அறிவிக்கப்பட்டுள்ளது. பிரபாஸின் 47-வது பிறந்தநாளைச் சிறப்பிக்கும் வகையில், ‘பவுசி’ படக்குழு ‘Declassifying File No. 25’ என்ற வாசகத்துடன் பிரத்யேக போஸ்டரை வெளியிட்டது. இந்த வெளியீடு ரசிகர்களிடையே உற்சாகத்தை ஏற்படுத்தியது. இந்நிலையில், பிறந்தநாளை முன்னிட்டு வெளியான சிறப்பு விளம்பர வீடியோவில் ‘சலார் 2’ திரைப்படம் குறித்த அறிவிப்பையும் இயக்குநர் பிரசாந்த் நீல் வெளியிட்டுள்ளார். அதன்படி, இப்படத்தின் படப்பிடிப்பு 2027-ம் ஆண்டு ஜூன் மாதம் தொடங்கத் திட்டமிடப்பட்டுள்ளது. ஏற்கெனவே ‘சலார்’ திரைப்படம் ரசிகர்களிடம் நல்ல வரவேற்பைப் பெற்றதால், அதன் தொடர்ச்சியாக உருவாகவுள்ள இரண்டாம் பாகம் மீதான எதிர்பார்ப்பு அதிகரித்துள்ளது. பிரபாஸ் மற்றும் பிரசாந்த் நீல் மீண்டும் இணைவதால், ‘சலார் 2’ படத்தின் அடுத்தடுத்த தகவல்களை அறிய ரசிகர்கள் ஆவலுடன் காத்திருக்கின்றனர்.
