தவெக நாகை மாவட்ட நிர்வாகி பூபாலனுடன் தொடர்புடையதாகக் கூறப்படும் போதைப்பொருள் பறிமுதல் சம்பவம் குறித்து தமிழக முதல்-அமைச்சர் விஜய் இதுவரை கருத்து தெரிவிக்காதது ஏன் என அதிமுக பொதுச்செயலாளர் எடப்பாடி பழனிசாமி கேள்வி எழுப்பியுள்ளார். இதுதொடர்பாக அவர் தனது எக்ஸ் தளத்தில் வெளியிட்டுள்ள பதிவில் கூறியிருப்பதாவது: கடந்த 18.10.2026 அன்று மத்திய நிதி அமைச்சகம் வெளியிட்ட செய்திக்குறிப்பில், தமிழக கடலோரப் பகுதிகளில் சமீபத்திய ஆண்டுகளில் நடைபெற்ற மிகப்பெரிய போதைப்பொருள் பறிமுதல்களில் இதுவும் ஒன்று எனக் குறிப்பிடப்பட்டுள்ளது. தமிழக முதல்-அமைச்சரே, இத்தகைய சம்பவம் மாநிலத்திற்கு எவ்வளவு அவப்பெயரை ஏற்படுத்துகிறது என்பதை உணர்கிறீர்களா? இந்தச் சம்பவம் மிகப்பெரிய போதைப்பொருள் வலையமைப்புடன் தொடர்புடையதாக செய்திகள் வெளியாகி வருகின்றன. பொறுப்பான பதவியில் இருக்கும் முதல்-அமைச்சர், குறைந்தபட்சம் தனது கட்சியின் தலைவராக, கட்சி நிர்வாகி மீதான இந்தக் குற்றச்சாட்டுகளுக்கு விளக்கம் அளிப்பார் என எதிர்பார்த்தோம். ஆனால், சட்டசபையில் எதிர்க்கட்சிகள் கேள்வி எழுப்பும்போது அமைதியாக இருப்பதைப் போலவே, இந்த விவகாரத்திலும் விஜய் மவுனம் காப்பதாக எடப்பாடி பழனிசாமி விமர்சித்துள்ளார். கடந்த ஆட்சிக் காலத்தில் ஜாபர் சாதிக் தொடர்பான வழக்கில், மெத்தம்பெட்டமைன் தயாரிப்புக்குப் பயன்படுத்தப்படும் சூடோஎபெட்ரின் என்ற மூலப்பொருள் பறிமுதல் செய்யப்பட்டது. அந்தச் சம்பவமே மக்களிடையே பெரும் கவலையை ஏற்படுத்தியது. ஆனால், தற்போது தவெக நிர்வாகி பூபாலன் தொடர்பான வழக்கில், முழுமையாக தயாரிக்கப்பட்ட மெத் கிரிஸ்டல் போதைப்பொருள் சுமார் 137 கிலோ, ரூ.400 கோடி மதிப்பில் கைப்பற்றப்பட்டுள்ளதாக அவர் சுட்டிக்காட்டியுள்ளார்.
Advertisement
ஆளுங்கட்சியுடன் தொடர்புடையதாகக் கூறப்படும் இத்தகைய சர்வதேச போதைப்பொருள் கடத்தல் நடவடிக்கைகள் நடைபெற்றிருக்கும்போது, முதல்-அமைச்சர் போதைப்பொருள் தடுப்பு விழிப்புணர்வு மாரத்தானில் பங்கேற்றதன் நோக்கம் என்ன என்றும் எடப்பாடி பழனிசாமி கேள்வி எழுப்பியுள்ளார். இந்த விவகாரம் குறித்து செய்தி வெளியிடும் ஊடகங்களை தவெக நாகை நகரச் செயலாளர் பால்ராஜ் மிரட்டுவதாகவும் செய்திகள் வெளியாகியுள்ளன. இதன் மூலம் போதைப்பொருள் விவகாரம் ஆளுங்கட்சித் தலைமைக்குத் தெரிந்தே, அவர்களின் ஆதரவுடன் நடைபெற்றதா என்ற சந்தேகம் எழுவதாக அவர் தெரிவித்துள்ளார். கட்சி நிர்வாகி மீதான குற்றச்சாட்டுகளுக்கு பதிலளிக்காமல், ஊடகங்களை மிரட்டுவதால் உண்மைகள் மறைந்துவிடுமா என்றும் முதல்-அமைச்சரிடம் கேள்வி எழுப்பியுள்ளார். மேலும், இந்தப் போதைப்பொருட்களை தமிழக காவல்துறை கைப்பற்றவில்லை என்றும், மத்திய அரசின் வருவாய் புலனாய்வு இயக்குநரகம் (DRI) தான் பறிமுதல் செய்துள்ளதாகவும் எடப்பாடி பழனிசாமி குறிப்பிட்டுள்ளார். இதற்காக தமிழக அரசும், முதல்-அமைச்சர் தலைமையிலான நிர்வாகமும் வெட்கப்பட வேண்டும் என விமர்சித்த அவர், மாற்றத்தை ஏற்படுத்துவதாகக் கூறி ஆட்சிக்கு வந்த விஜய் இந்த விவகாரம் குறித்து விளக்கம் அளிப்பாரா என்றும் கேள்வி எழுப்பியுள்ளார். இவ்வாறு எடப்பாடி பழனிசாமி தனது பதிவில் தெரிவித்துள்ளார்.
