தவெக ஆட்சியில் நிர்வாகக் குறைபாடுகள் தொடர்கின்றன; அவற்றை மறைக்க முடியாது - நயினார் நாகேந்திரன்

எத்தனை பொய்யான குற்றச்சாட்டுகளை முன்வைத்தாலும், புலம்பித் தீர்த்தாலும், தவெக ஆட்சியில் நிலவும் நிர்வாகத் திறமையின்மையையும் தொடர்ந்து நடைபெறும் சீர்கேடுகளையும் மறைத்துவிட முடியாது என தமிழக பாஜக தலைவர் நயினார் நாகேந்திரன் விமர்சித்துள்ளார். இதுகுறித்து அவர் தனது எக்ஸ் தளத்தில் வெளியிட்ட பதிவில் கூறியிருப்பதாவது: மக்களை விலைவாசி உயர்வால் தொடர்ந்து பாதிக்கும் வகையில், ஒரு யூனிட் மின்சாரத்தை ரூ.41-க்கு வாங்க முயற்சித்தது முதல் சிறையில் இருந்து கைதிகள் தப்பிச் செல்லும் சம்பவங்கள் வரை, தனது துறைகளில் நிகழும் தவறுகளைத் தடுக்க முடியாமல் தவெக அரசு தடுமாறி வருகிறது. இந்நிலையில், ஆட்சியைக் கவிழ்க்க அதிமுகவும் பாஜகவும் சதி செய்வதாக எந்த அடிப்படை ஆதாரமும் இல்லாத குற்றச்சாட்டை தவெக முன்வைப்பது வேடிக்கையாக உள்ளது. மக்கள் வழங்கிய தீர்ப்பை மதிக்காமல், வெற்றி பெற்ற பிற கட்சி வேட்பாளர்களிடம் பேரம் பேசி அவர்களை தங்கள் பக்கம் இழுக்க முயற்சிக்கும் தவெக, தற்போது மற்ற கட்சிகள் தனது சட்டமன்ற உறுப்பினர்களை விலைக்கு வாங்க முயற்சிப்பதாகக் கூறுவது முரண்பாடானது.

இந்த ஆதாரமற்ற குற்றச்சாட்டுகளை மக்கள் நகைச்சுவையாகக் கருதி கடந்து செல்வார்கள். ஆனால், அரசின் தவறுகளைத் திசைதிருப்பும் முயற்சிகளுக்கு அவர்கள் ஏமாற மாட்டார்கள். எத்தனை பொய்யான புகார்களை முன்வைத்தாலும், நிர்வாகத் திறமையின்மையையும் தவெக ஆட்சியில் தொடரும் சீர்கேடுகளையும் மறைக்க முடியாது. எனவே, பிற கட்சிகள் மீது தேவையற்ற குற்றச்சாட்டுகளைச் சுமத்துவதற்குப் பதிலாக, குதிரைப் பேரத்தில் ஈடுபடுவதை நிறுத்திவிட்டு மக்களின் நலனில் கவனம் செலுத்த வேண்டும். இவ்வாறு நயினார் நாகேந்திரன் தெரிவித்துள்ளார்.