ரஜினிகாந்த் நடிப்பில் தயாராகி வரும் 'தர்மன்' திரைப்படத்தில், 'ஜெயிலர் 2' படத்தில் பழக்கடை மூர்த்தி கதாபாத்திரத்தில் நடித்த நமோ நாராயணா முக்கியத்துவம் வாய்ந்த சுவாரஸ்யமான வேடத்தில் நடிக்க உள்ளதாகத் தகவல் வெளியாகியுள்ளது. ரஜினிகாந்தின் 173-வது படமாக உருவாகும் 'தர்மன்' திரைப்படத்தை, 'ஓ மை கடவுளே', 'டிராகன்' உள்ளிட்ட படங்களை இயக்கிய அஸ்வத் மாரிமுத்து இயக்குகிறார். கமல்ஹாசனின் ராஜ்கமல் பிலிம்ஸ் இன்டர்நேஷனல் நிறுவனம் தயாரிக்கும் இப்படம், அதிரடி அம்சங்கள் நிறைந்த கதைக்களத்தில் உருவாகி வருகிறது. இதில் ரஜினிகாந்த் மருத்துவராக நடிப்பதாகக் கூறப்படுகிறது. நயன்தாரா, சிம்ரன், ராஷி கன்னா, யோகிபாபு உள்ளிட்டோர் முக்கிய வேடங்களில் நடிக்கின்றனர். அனிருத் இசையமைக்கும் இப்படத்திற்கு நிகேத் பொம்மி ஒளிப்பதிவு செய்கிறார். படத்தொகுப்புப் பணிகளைப் பிரதீப் ஈ. ராகவ் கவனிக்கிறார். மேலும், தெலுங்கு நடிகர் ராம் பொதினேனி இப்படத்தில் ரஜினிகாந்துக்கு எதிரான வில்லன் கதாபாத்திரத்தில் நடிக்க இருப்பதாகவும் தகவல்கள் தெரிவிக்கின்றன. இப்படத்தின் மூன்றாம் கட்டப் படப்பிடிப்பு நிறைவடைந்துவிட்டதாக இயக்குநர் அஸ்வத் மாரிமுத்து அண்மையில் தெரிவித்திருந்தார்.
Advertisement
அடுத்தகட்டப் படப்பிடிப்புப் பணிகள் தொடர்ந்து நடைபெற்று வரும் நிலையில், 'தர்மன்' திரைப்படத்தை அடுத்த ஆண்டு வெளியிடப் படக்குழு திட்டமிட்டுள்ளதாகக் கூறப்படுகிறது. இதனிடையே, 'ஜெயிலர் 2' படத்தில் பழக்கடை மூர்த்தியாக நடித்த நமோ நாராயணா தனது நடிப்பின் மூலம் ரசிகர்களின் கவனத்தை ஈர்த்தார். அவரது கதாபாத்திரத்திற்கும் நடிப்பிற்கும் நல்ல வரவேற்பு கிடைத்ததாகக் கூறப்படுகிறது. இந்தச் சூழலில், 'தர்மன்' படத்திலும் அவருக்கு ஒரு சுவாரஸ்யமான கதாபாத்திரம் வழங்கப்பட உள்ளதாகத் தகவல்கள் வெளியாகியுள்ளன. திரையில் குறைந்த நேரமே தோன்றினாலும் கதைக்கு முக்கியத்துவம் சேர்க்கும் வகையில் இந்த வேடம் அமைந்திருக்கும் எனக் கூறப்படுகிறது. முதலில் இந்தக் கதாபாத்திரத்தில் மற்றொரு நடிகரை நடிக்க வைக்கப் படக்குழு ஆலோசித்ததாகவும், 'ஜெயிலர் 2' படத்தில் நமோ நாராயணாவின் நடிப்பைப் பார்த்துப் பாராட்டிய ரஜினிகாந்த், அவரை இந்தப் படத்திற்குப் பரிந்துரைத்ததாகவும் தகவல்கள் தெரிவிக்கின்றன. இதனால், 'தர்மன்' படத்தில் நமோ நாராயணா ஏற்று நடிக்கவுள்ள கதாபாத்திரம் குறித்த எதிர்பார்ப்பு ரசிகர்களிடையே உருவாகியுள்ளது.
