“சில நேரங்களில் அது நான்தானா என்றே தெரியவில்லை” – ஏஐ தொழில்நுட்பம் குறித்து ஸ்ரேயா சரண் கவலை

செயற்கை நுண்ணறிவு (ஏஐ) தொழில்நுட்பத்தைத் தவறாகப் பயன்படுத்தி பெண்களின் புகைப்படங்களை ஆபாசமாக மாற்றிப் பரப்புவது குறித்து நடிகை ஸ்ரேயா சரண் தனது கவலையை வெளிப்படுத்தியுள்ளார். இத்தகைய செயல்கள் பெண்களின் தனியுரிமைக்கும் கண்ணியத்துக்கும் பாதிப்பை ஏற்படுத்துவதாகவும் அவர் தெரிவித்துள்ளார். தமிழ், தெலுங்கு, இந்தி உள்ளிட்ட பல மொழித் திரைப்படங்களில் நடித்துள்ள ஸ்ரேயா சரண், தமிழில் ‘சிவாஜி’, ‘அழகிய தமிழ் மகன்’, ‘கந்தசாமி’, ‘குட்டி’ உள்ளிட்ட படங்கள் மூலம் ரசிகர்களிடம் பிரபலமானவர். திருமணத்துக்குப் பிறகு சில ஆண்டுகள் திரைப்படங்களில் நடிப்பதைக் குறைத்திருந்த அவர், தற்போது மீண்டும் படங்களில் கவனம் செலுத்தி வருகிறார். இந்நிலையில், நேர்காணல் ஒன்றில் பங்கேற்ற அவர், ஏஐ தொழில்நுட்பத்தின் தவறான பயன்பாடு குறித்துப் பேசினார். குறிப்பாக, பெண்களின் புகைப்படங்களை ஏஐ மூலம் ஆபாசமான படங்களாக மாற்றி சமூகத்தில் பரப்புவது பெரும் கவலை அளிப்பதாகக் குறிப்பிட்டார்.

இதுகுறித்து தனது அனுபவத்தைப் பகிர்ந்துகொண்ட ஸ்ரேயா சரண், “சில நேரங்களில் அது நான்தானா என்றே தெரியவில்லை” என்று தெரிவித்தார். ஏஐ மூலம் உருவாக்கப்படும் போலிப் புகைப்படங்கள் பார்ப்பதற்கு உண்மையானவை போலவே இருப்பதால், அவற்றின் நம்பகத்தன்மையைச் சரிபார்ப்பதும், அவை போலியானவை என்பதைக் கண்டறிவதும் கடினமாக இருப்பதாக அவர் சுட்டிக்காட்டினார். தொழில்நுட்பத்தின் முன்னேற்றத்தை ஆக்கப்பூர்வமாகப் பயன்படுத்த வேண்டுமே தவிர, அதன் மூலம் பெண்களின் தனிப்பட்ட உரிமைகளையும் சமூக மரியாதையையும் பாதிக்கும் செயல்களில் ஈடுபடக் கூடாது என்றும் ஸ்ரேயா சரண் வலியுறுத்தியுள்ளார். ஏஐ தொழில்நுட்பத்தின் தவறான பயன்பாட்டால் பெண்கள் எதிர்கொள்ளும் பிரச்சினைகள் குறித்து அவர் தெரிவித்துள்ள கருத்துகள் தற்போது கவனம் பெற்றுள்ளன.