சென்னை காசிமேடு மீன் சந்தையில் மீன்களின் வரத்து குறைந்ததால், கடந்த சில வாரங்களைக் காட்டிலும் விலை அதிகரித்துள்ளது. வஞ்சிரம் மீன் ஒரு கிலோ ரூ.950-க்கு விற்பனை செய்யப்பட்டது. சென்னை காசிமேடு மீன்பிடி துறைமுகத்தில் இருந்து தமிழகத்தின் பல்வேறு பகுதிகளுக்கும் அண்டை மாநிலங்களுக்கும் மீன்கள் விற்பனைக்காக அனுப்பி வைக்கப்படுகின்றன. வாரந்தோறும் சனி மற்றும் ஞாயிற்றுக்கிழமைகளில் சென்னை மற்றும் அதன் சுற்றுவட்டாரப் பகுதிகளைச் சேர்ந்த ஏராளமானோர் இங்கு வந்து மீன்களை வாங்கிச் செல்வது வழக்கம். இந்த ஆண்டு புரட்டாசி மாதம் தொடங்கியதைத் தொடர்ந்து, இந்துக்களில் பலர் அசைவ உணவுகளைத் தவிர்த்தனர். இதனால் கடந்த 5 வாரங்களாக காசிமேடு மீன் சந்தைக்கு வரும் மக்களின் எண்ணிக்கை குறைந்தது. புரட்டாசி மாதம் நிறைவடைந்த பின்னரும் ஆயுதபூஜை, ஐப்பசி அன்னாபிஷேகம் உள்ளிட்ட விசேஷ நாட்கள் காரணமாக எதிர்பார்த்த அளவுக்கு வாடிக்கையாளர்கள் வரவில்லை. இந்நிலையில், நேற்று காசிமேடு மீன் சந்தைக்கு வழக்கமான வியாபாரிகளும் பொதுமக்களும் வந்து மீன்களை வாங்கிச் சென்றனர்.
Advertisement
இருப்பினும், மீன்களின் விலை முந்தைய வாரங்களைவிட அதிகமாக இருந்தது. சந்தைக்கு மீன்கள் வரத்து குறைந்ததே இந்த விலை உயர்வுக்குக் காரணம் என வியாபாரிகள் தெரிவித்தனர். இதுகுறித்து மொத்த மீன் வியாபாரி ஒருவர் கூறுகையில், விசேஷ நாட்கள் தொடர்ந்து வந்ததால் சந்தையில் கூட்டம் குறைவாக இருந்தாலும், வழக்கமான வியாபாரிகளும் பொதுமக்களும் மீன்களை வாங்கிச் செல்கின்றனர். மீன்களின் வரத்து குறைந்துள்ளதால் விலை சற்று அதிகரித்துள்ளது. அடுத்த ஞாயிற்றுக்கிழமை சந்தைக்கு அதிகளவில் மக்கள் வருவார்கள் என எதிர்பார்ப்பதாகத் தெரிவித்தார். காசிமேடு மீன் சந்தையில் நேற்றைய விலை நிலவரம் ஒரு கிலோ மீன்களின் விலை விவரம்: - வஞ்சிரம் – ரூ.950 - கொடுவா – ரூ.600 - சிறிய வவ்வால் – ரூ.500 - பெரிய வவ்வால் – ரூ.800 - சீலா – ரூ.500 - பாறை – ரூ.500 - சங்கரா – ரூ.350 - அயலை – ரூ.250 - சிறிய இறால் – ரூ.250 - பெரிய இறால் – ரூ.600 - கல் இறால் – ரூ.1,200 - கணவாய் (ஆக்டோபஸ்) – ரூ.300 - ஸ்க்விட் – ரூ.400 - கட்டில் கணவாய் – ரூ.5,500
