மதுராந்தகம் (தனி), தாராபுரம் (தனி) ஆகிய 2 சட்டமன்ற தொகுதிகளுக்கும் அக்டோபர் 6-ம் தேதி இடைத்தேர்தல் நடைபெறும் என தேர்தல் ஆணையம் அறிவித்துள்ளது. இதையடுத்து, இரு தொகுதிகளிலும் தேர்தல் பணிகள் சூடுபிடித்துள்ளன. வேட்புமனு தாக்கல் இன்று (புதன்கிழமை) தொடங்குகிறது. த.வெ.க. ஆட்சி அமைந்த சில மாதங்களிலேயே இந்த இடைத்தேர்தல் நடைபெற உள்ளதால், புதிய ஆட்சியின் செயல்பாடுகள் மற்றும் அதன் கொள்கைகளை மக்கள் எந்த அளவுக்கு ஏற்றுக்கொண்டுள்ளனர் என்பதை வெளிப்படுத்தும் முக்கியமான தேர்தலாக இது பார்க்கப்படுகிறது. இதனால், இரு தொகுதிகளிலும் வெற்றி பெற வேண்டும் என்ற நோக்கில் த.வெ.க. தீவிர தேர்தல் பணிகளில் ஈடுபடும் என எதிர்பார்க்கப்படுகிறது. அதேபோல், அதிமுகவைச் சேர்ந்த எம்.எல்.ஏ.க்கள் ராஜினாமா செய்ததன் காரணமாகவே இந்த இடைத்தேர்தல் நடைபெறுகிறது. எனவே, தங்களுக்கு ஏற்கனவே உள்ள தொகுதி செல்வாக்கை தக்கவைத்துக் கொள்ள அதிமுகவும் தீவிரமாக செயல்பட்டு வருகிறது. தமிழக சட்டமன்றத்தின் பிரதான எதிர்க்கட்சியான திமுக இந்த இடைத்தேர்தலில் போட்டியிடுமா அல்லது தேர்தலை புறக்கணிக்குமா என்ற கேள்வி இதுவரை நீடித்து வந்தது.
Advertisement
இதுகுறித்து இன்று மு.க.ஸ்டாலின் இல்லத்தில் ஆலோசனை நடைபெற்று வருகிறது. இந்த நிலையில், இடைத்தேர்தலில் திமுக போட்டியிட முடிவு செய்துள்ளதாக தகவல் வெளியாகியுள்ளது. கடந்த சட்டமன்ற தேர்தலில் தாராபுரம் தொகுதியில் திமுக இரண்டாவது இடத்தைப் பிடித்து தோல்வியடைந்தது. மதுராந்தகம் தொகுதியில் திமுக மூன்றாவது இடத்தைப் பிடித்திருந்தது. இடைத்தேர்தலை புறக்கணித்தால் கட்சி நிர்வாகிகள் மற்றும் தொண்டர்கள் மத்தியில் சோர்வு ஏற்படக்கூடும் என்றும், திமுகவை தொடர்ந்து விமர்சித்து வரும் விஜய்க்கு தேர்தல் மூலம் பதிலடி கொடுக்க வேண்டும் என்றும் கட்சி நிர்வாகிகள் வலியுறுத்தியதாக கூறப்படுகிறது. இதன் அடிப்படையில், இடைத்தேர்தலை சந்திப்பதற்கான முடிவை திமுக தலைமை எடுத்துள்ளதாக தகவல்கள் தெரிவிக்கின்றன. மேலும், திமுக சார்பில் போட்டியிடும் வேட்பாளர்கள் குறித்த அறிவிப்பு நாளை அல்லது நாளை மறுநாள் வெளியாகலாம் என்றும் தகவல் வெளியாகியுள்ளது.
