“ஜமீன்களிலும் பண்ணைகளிலும் இருந்த அரசியலை பாமரர்களிடம் கொண்டு சேர்த்தது திமுக” - உதயநிதி

திராவிட முன்னேற்றக் கழகம் தொடங்கப்பட்டு 78-வது ஆண்டில் அடியெடுத்து வைப்பதை முன்னிட்டு, திமுக இளைஞரணி செயலாளர் உதயநிதி ஸ்டாலின் தனது ‘எக்ஸ்’ பக்கத்தில் வாழ்த்து பதிவை வெளியிட்டுள்ளார். அதில், அரசியல் என்பது குறிப்பிட்ட சமூகத்தினரிடமும், பண்ணைகளிலும் மட்டுமே இருந்த காலகட்டத்தில், அதை சாதாரண மக்களிடமும் கொண்டு சென்ற இயக்கமாக திமுக உருவானதாக அவர் குறிப்பிட்டுள்ளார். 1940-களில் பேரறிஞர் அண்ணாவும், 20-களில் இருந்த கலைஞர் கருணாநிதி உள்ளிட்ட அவரது சகோதரர்களும் இணைந்து, கனமழையிலும் திமுகவை தொடங்கியதாக அவர் தெரிவித்துள்ளார். ஆட்சியில் இருந்தாலும் இல்லாவிட்டாலும், கடந்த 78 ஆண்டுகளில் தமிழ்ச் சமூகத்தை பல்வேறு உயரங்களுக்கு முன்னேற்றிய பெருமை திமுகவுக்கு இருப்பதாகவும் உதயநிதி கூறியுள்ளார். சமூக நீதி, மாநில உரிமை, பெண்கள் விடுதலை, தொழில் வளர்ச்சி உள்ளிட்ட கொள்கைகளை அடிப்படையாகக் கொண்டு கட்சி செயல்பட்டு வருவதாகவும் அவர் தெரிவித்துள்ளார்.

தமிழ்நாடு என பெயர் மாற்றம் செய்யப்பட்டதிலிருந்து, மாநிலத்தை தனித்துவம் மிக்கதாக உருவாக்கியது வரை திமுக மேற்கொண்ட பணிகள் ஏராளம் என்றும் அவர் குறிப்பிட்டுள்ளார். பல அடக்குமுறைகள், நெருக்கடிகள் மற்றும் பல்வேறு எதிர்ப்புகளை எதிர்கொண்டபோதிலும், முதலமைச்சர் மு.க. ஸ்டாலின் தலைமையில் திமுக தொடர்ந்து வேகமாக செயல்பட்டு வருவதாகவும் உதயநிதி தெரிவித்துள்ளார். நூற்றாண்டை நோக்கி பயணிக்கும் திமுகவின் வளர்ச்சிக்காக தொடர்ந்து உழைப்போம் என்றும், கட்சியின் கருப்பு - சிவப்பு நிறங்கள் வெறும் நிறங்கள் அல்ல, அவை தங்களின் உயிர் என்றும் குறிப்பிட்டுள்ள உதயநிதி, திமுக வாழ்க என தனது பதிவில் தெரிவித்துள்ளார்.