தமிழ்நாடு சட்டமன்றத்தில் முதல்-அமைச்சர் விஜய் பேசியதாகக் கூறப்படும் கருத்துகளுக்கு எதிர்ப்பு தெரிவித்து, வரும் செப்டம்பர் 12-ம் தேதி மாவட்டத் தலைநகரங்களில் கண்டன ஆர்ப்பாட்டம் நடத்தப்படும் என தி.மு.க. தலைமை அறிவித்துள்ளது. இதுதொடர்பாக தி.மு.க. வெளியிட்ட அறிக்கையில், அக்கட்சியையும் முன்னாள் முதல்-அமைச்சர் கலைஞர் கருணாநிதியையும், முன்னாள் மத்திய அமைச்சர் முரசொலி மாறனையும், முதல்-அமைச்சர் மு.க.ஸ்டாலினின் அரசியல் தியாகங்களையும் கொச்சைப்படுத்தும் வகையில் சட்டமன்றத்தில் விஜய் பேசியதாக குற்றம்சாட்டப்பட்டுள்ளது. மேலும், அவரது பேச்சு சட்டமன்றத்தின் மாண்பு, மரபு மற்றும் வரலாற்றுக்கு எதிரானது என்றும் அறிக்கையில் விமர்சிக்கப்பட்டுள்ளது. சட்டமன்றத்தை அரசியல் நடவடிக்கைகளுக்கான தந்திர மேடையாக த.வெ.க. அரசு பயன்படுத்துவதாகவும் தி.மு.க. குற்றம்சாட்டியுள்ளது. ஆட்சியின் தோல்விகளுக்கு பதிலளிக்க முடியாமல் விஜய் தரக்குறைவான கருத்துகளை தெரிவிப்பதாகவும் அந்த அறிக்கையில் கூறப்பட்டுள்ளது. இதனை கண்டித்து, செப்டம்பர் 12-ம் தேதி சனிக்கிழமை காலை 10.30 மணிக்கு மாவட்டத் தலைநகரங்களில், மாவட்டக் கழகச் செயலாளர்கள் தலைமையில் மாபெரும் கண்டன ஆர்ப்பாட்டம் நடைபெறும் என அறிவிக்கப்பட்டுள்ளது.
Advertisement
இதற்கிடையே, தாராபுரம் மற்றும் மதுராந்தகம் சட்டமன்ற தொகுதிகளுக்கான இடைத்தேர்தலில் போட்டியிடும் தி.மு.க. வேட்பாளர்களும் அறிவிக்கப்பட்டுள்ளனர். மதுராந்தகம் தொகுதியில் தி.மு.க. சட்டத்துறை இணைச் செயலாளர் பரந்தாமனும், தாராபுரம் தொகுதியில் வழக்கறிஞர் சுகன்யாவும் போட்டியிட உள்ளதாக தெரிவிக்கப்பட்டுள்ளது. இந்நிலையில், இடைத்தேர்தலில் ஆளுங்கட்சிக்கு கூடுதல் செல்வாக்கு இருக்குமா என தி.மு.க. பொதுச் செயலாளர் துரைமுருகனிடம் செய்தியாளர்கள் கேள்வி எழுப்பினர். இதற்கு பதிலளித்த துரைமுருகன், தி.மு.க.வுக்கு வெற்றி வாய்ப்பு பிரகாசமாக இருப்பதாக தெரிவித்தார். எம்.ஜி.ஆர். ஆட்சியில் இருந்த காலத்திலேயே அண்ணாநகர் மற்றும் மயிலாடுதுறை தொகுதிகளில் தி.மு.க. வெற்றி பெற்றுள்ளதாக அவர் குறிப்பிட்டார். மேலும், “ஆளுங்கட்சிதான் இடைத்தேர்தலில் ஜெயிக்கும் என்பது இலக்கணம் கிடையாது” என்று துரைமுருகன் தெரிவித்தார்.
