தமிழகத்தில் பி.எஸ்சி. நர்சிங் உள்ளிட்ட துணை மருத்துவப் படிப்புகளுக்காக அரசு கல்வி நிறுவனங்களில் புதிதாக 3,878 இடங்கள் உருவாக்கப்பட்டுள்ளன. இந்த இடங்களும் நடப்பு கல்வியாண்டுக்கான மூன்றாம் சுற்று மாணவர் சேர்க்கைக் கலந்தாய்வில் சேர்க்கப்பட்டுள்ளதாக மருத்துவக் கல்வி மற்றும் ஆராய்ச்சி இயக்ககம் தெரிவித்துள்ளது. தமிழகத்தில் உள்ள 6 அரசு மருத்துவக் கல்லூரிகளில் செவிலியர் பட்டப்படிப்புக்கான இடங்கள் அதிகரிக்கப்படுவதுடன், புதிதாக 6 அரசு செவிலியர் கல்லூரிகளும் தொடங்கப்பட உள்ளதாக மருத்துவம் மற்றும் மக்கள் நல்வாழ்வுத்துறை அறிவித்துள்ளது. இதன் தொடர்ச்சியாக, அரசு மற்றும் சுயநிதி மருத்துவக் கல்லூரிகளில் பி.எஸ்சி. நர்சிங், பி.பார்ம், பி.பி.டி., பி.ஓ.டி. உள்ளிட்ட துணை மருத்துவப் படிப்புகளுக்கான மாணவர் சேர்க்கை நடைபெற்று வருகிறது. மாணவர்கள் மற்றும் பெற்றோர்களின் நீண்டகால கோரிக்கையைத் தொடர்ந்து, அரசு நிறுவனங்களில் இந்த ஆண்டு கூடுதலாக 3,878 இடங்கள் ஏற்படுத்தப்பட்டுள்ளன. முதலாவது மற்றும் இரண்டாவது சுற்று கலந்தாய்வுகள் நிறைவடைந்துள்ள நிலையில், காலியாக உள்ள இடங்களையும் புதிதாக உருவாக்கப்பட்ட இடங்களையும் நிரப்புவதற்கான மூன்றாம் சுற்று இணையவழிக் கலந்தாய்வு தொடங்கியுள்ளது.
Advertisement
முந்தைய சுற்றுகளில் இடம் கிடைக்காத மாணவர்களுக்கும், குறைந்த கட்-ஆப் மதிப்பெண்களுடன் காத்திருப்பவர்களுக்கும் இந்த வாய்ப்பு உதவியாக இருக்கும் என எதிர்பார்க்கப்படுகிறது. மூன்றாம் சுற்றுக் கலந்தாய்வில் பங்கேற்கத் தகுதியான தரவரிசைப் பட்டியலில் இடம்பெற்றுள்ள விண்ணப்பதாரர்கள், புதிதாகச் சேர்க்கப்பட்ட இடங்கள் மற்றும் ஏற்கெனவே காலியாக உள்ள இடங்களுக்குத் தங்களது விருப்பக் கல்லூரிகளைத் தேர்வு செய்து ஆன்லைனில் விண்ணப்பிக்கலாம். இதற்காக, தகுதியுள்ள மாணவர்கள் மருத்துவத் தேர்வுக் குழுவின் அதிகாரப்பூர்வ இணையதளமான tnmedicalselection.net-க்குச் சென்று, தங்களது உள்நுழைவு விவரங்களைப் பயன்படுத்தி கல்லூரி மற்றும் பாடப்பிரிவுகளுக்கான விருப்பங்களைப் பதிவு செய்யுமாறு அறிவுறுத்தப்பட்டுள்ளனர்.
