ஹீரோவாகும் ஜேசன் சஞ்சய்? புதிய படம் குறித்து வெளியான தகவல்

தமிழக முதல்-அமைச்சர் விஜய்யின் மகனும் இயக்குநருமான ஜேசன் சஞ்சய், விரைவில் கதாநாயகனாகத் திரையில் அறிமுகமாக உள்ளதாகத் தகவல் வெளியாகியுள்ளது. இந்தச் செய்தி அவரது ரசிகர்கள் மத்தியில் எதிர்பார்ப்பை ஏற்படுத்தியுள்ளது. ஜேசன் சஞ்சய் இயக்கத்தில் சந்தீப் கிஷன் நடிப்பில் அண்மையில் வெளியான திரைப்படம் ‘சிக்மா’. வணிக அம்சங்களைக் கொண்ட கதைக்களத்தில் உருவான இந்தப் படம் ரசிகர்களிடையே நல்ல வரவேற்பைப் பெற்றதாகக் கூறப்படுகிறது. இப்படத்தின் விளம்பர நிகழ்ச்சிகளில் ஜேசன் சஞ்சய் பங்கேற்றபோது, அவரும் நடிகராகத் திரையில் தோன்ற வேண்டும் என ரசிகர்கள் பலர் தங்களது விருப்பத்தை வெளிப்படுத்தினர். இதனால், அவர் நடிப்புத் துறையில் எப்போது கால்பதிப்பார் என்ற எதிர்பார்ப்பும் எழுந்தது. இந்நிலையில், ஜேசன் சஞ்சய் கதாநாயகனாக நடிக்கப் புதிய படம் தயாராக உள்ளதாகத் தகவல் பரவி வருகிறது. லைக்கா புரொடக்‌ஷன்ஸ் தயாரிக்கும் இந்தப் படத்தை, ஜேசன் சஞ்சயின் சித்தப்பாவும் ‘தாக்க தாக்க’ படத்தின் இயக்குநருமான சஞ்சீவ் இயக்கவுள்ளதாகக் கூறப்படுகிறது. இருப்பினும், ஜேசன் சஞ்சய் கதாநாயகனாக நடிப்பது மற்றும் படத்தின் தயாரிப்பு குறித்த அதிகாரப்பூர்வ அறிவிப்பு இதுவரை வெளியாகவில்லை. இந்தத் தகவல் உறுதியானால், இயக்குநராக அறியப்படும் ஜேசன் சஞ்சயை நடிகராகவும் திரையில் காண ரசிகர்களுக்கு வாய்ப்பு கிடைக்கும் என்ற எதிர்பார்ப்பு நிலவுகிறது.