படம் தயாராகிறது… Generating image…
டெல்லியில் பல்வேறு இடங்களில் நடைபெற்ற தசரா மற்றும் விஜயதசமி விழாக்களில் ஜனாதிபதி திரவுபதி முர்மு, பிரதமர் நரேந்திர மோடி உள்ளிட்ட முக்கிய தலைவர்கள் பங்கேற்றனர். துவாரகா பகுதியில் உள்ள ஸ்ரீ ராம் லீலா மைதானத்தில் நடைபெற்ற விழாவில் ஜனாதிபதி திரவுபதி முர்மு, டெல்லி முதல்-மந்திரி ரேகா குப்தா மற்றும் அமைச்சரவை அமைச்சர் பர்வேஷ் வர்மா ஆகியோர் கலந்துகொண்டனர். அங்கு ராமர், லட்சுமணன், சீதை ஆகியோருக்கு ஜனாதிபதி பாரம்பரிய முறைப்படி ஆரத்தி எடுத்து வழிபட்டார். பின்னர், ராவணனின் உருவ பொம்மையை எரிக்கும் நிகழ்விலும் பங்கேற்றார். இதற்கிடையே, கிழக்கு டெல்லியின் ஐ.பி. எக்ஸ்டென்ஷன் பகுதியில் உள்ள இந்திரபிரஸ்தா ராம்லீலா மைதானத்தில் நடைபெற்ற விஜயதசமி விழாவில் பிரதமர் நரேந்திர மோடி கலந்துகொண்டார். செங்கோட்டைக்கு அருகிலுள்ள ராம்லீலா மைதானத்தில் நடைபெற்ற லவ் குஷ் ராம் லீலா கொண்டாட்டங்களில் துணை ஜனாதிபதி சி.பி. ராதாகிருஷ்ணன், டெல்லி துணைநிலை ஆளுநர் தரன்ஜித் சிங் சந்து மற்றும் சாந்தினி சவுக் தொகுதி நாடாளுமன்ற உறுப்பினர் பிரவீன் கண்டேல்வால் ஆகியோரும் பங்கேற்றனர். தீமையை வெல்வதன் அடையாளம் தசரா துவாரகாவில் நடைபெற்ற நிகழ்ச்சியில் பேசிய முதல்-மந்திரி ரேகா குப்தா, தசரா டெல்லி மக்களுக்கு மகிழ்ச்சியளிக்கும் நாள் என்று குறிப்பிட்டார். ராவணனை ராமர் வென்றதை நினைவுகூர்வதுடன், தீமையை நன்மை வெல்வதையும் இவ்விழா உணர்த்துவதாக அவர் தெரிவித்தார். மேலும், இருள், ஆணவம், கோபம், பெண்களுக்கு எதிரான வன்முறை, ஊழல் போன்ற வடிவங்களில் ராவணனின் தீய குணங்கள் சமூகத்தில் இன்னும் தொடர்வதாகவும் அவர் கூறினார். தசரா பண்டிகையையொட்டி மக்களுக்கு வாழ்த்து தெரிவித்த ஜனாதிபதி திரவுபதி முர்மு, ராமரின் நற்பண்புகளை அனைவரும் தங்கள் வாழ்வில் பின்பற்ற வேண்டும் என்று வலியுறுத்தினார். ராமரின் வாழ்க்கைக் கதை இயற்கையை மதிப்பது, சுற்றுச்சூழலைப் பாதுகாப்பது, அனைவரிடமும் அக்கறை காட்டுவது ஆகியவற்றுக்கு மக்களை ஊக்குவிப்பதாகவும் அவர் தெரிவித்தார். 90 அடி உயரத்தில் ராவணன் உருவ பொம்மைகள் துவாரகா ஸ்ரீ ராம் லீலா விழாவில் ராவணன், கும்பகர்ணன், மேகநாதன் ஆகியோரின் 90 அடி உயர உருவ பொம்மைகள் அமைக்கப்பட்டிருந்தன. இந்த ஆண்டு பாரம்பரியக் கொண்டாட்டங்களுடன் டிஜிட்டல் தொழில்நுட்ப முயற்சிகளும் சுற்றுச்சூழலுக்கு உகந்த நடவடிக்கைகளும் இணைக்கப்பட்டிருந்தன. விழா நிகழ்ச்சிகள் சமூக வலைதளங்களில் நேரடியாக ஒளிபரப்பப்பட்டன. மேலும், கொண்டாட்டங்களின்போது பசுமைப் பட்டாசுகள் பயன்படுத்தப்பட்டன.
