படம் தயாராகிறது… Generating image…
நடிகர் ஷாருக்கான் நடிப்பில் உருவாகி வரும் ‘கிங்’ திரைப்படம், திரையரங்குகளில் வெளியாவதற்கு முன்பே பல்வேறு உரிமைகள் விற்பனை மூலம் ரூ.665 கோடி வியாபாரம் செய்துள்ளதாக தகவல்கள் வெளியாகியுள்ளன. ‘பதான்’ திரைப்படத்தின் வெற்றிக்குப் பிறகு நடிகர் ஷாருக்கானும், இயக்குநர் சித்தார்த் ஆனந்தும் மீண்டும் கூட்டணி அமைத்துள்ள படம் ‘கிங்’. இதில் ஷாருக்கானுடன் அவரது மகள் சுஹானா கான், தீபிகா படுகோனே, ராணி முகர்ஜி, அபிஷேக் பச்சன் உள்ளிட்ட பலர் முக்கிய கதாபாத்திரங்களில் நடித்துள்ளனர். நீண்ட இடைவெளிக்குப் பிறகு ஷாருக்கான் நடிப்பில் வெளியாகவுள்ள இப்படம், வரும் டிசம்பர் 24-ம் தேதி கிறிஸ்துமஸ் பண்டிகையை முன்னிட்டு திரையரங்குகளில் வெளியாகிறது. ஷாருக்கானின் பிறந்தநாளான நவம்பர் 2-ம் தேதி படத்தின் முதல் பாடல் வெளியிடப்பட்டது. இதனைத் தொடர்ந்து படத்திற்கான விளம்பரப் பணிகளும் தொடங்கியுள்ளன. இந்நிலையில், படத்தின் திரையரங்கு விநியோகம், ஓ.டி.டி., தொலைக்காட்சி மற்றும் இசை உரிமைகள் மூலம் மொத்தம் ரூ.665 கோடி வருவாய் கிடைத்துள்ளதாக கூறப்படுகிறது. இதன்படி, இந்தியாவில் திரையிடுவதற்கான விநியோக உரிமையை பென் மருதர் நிறுவனம் ரூ.250 கோடிக்கும், வெளிநாட்டு திரையரங்கு விநியோக உரிமையை பார்ஸ் பிலிம்ஸ் நிறுவனம் ரூ.175 கோடிக்கும் பெற்றுள்ளதாக தகவல் வெளியாகியுள்ளது. மேலும், நெட்பிளிக்ஸ் நிறுவனம் படத்தின் ஓ.டி.டி. உரிமையை ரூ.150 கோடிக்கு வாங்கியுள்ளதாகவும், தொலைக்காட்சி ஒளிபரப்பு உரிமை ரூ.25 கோடிக்கும், இசை உரிமை ரூ.65 கோடிக்கும் விற்பனையாகியுள்ளதாகவும் கூறப்படுகிறது. இவை அனைத்தையும் சேர்த்தால் மொத்த வியாபார மதிப்பு ரூ.665 கோடியாகிறது. இதற்கிடையே, ‘கிங்’ திரைப்படம் ஆரம்பத்தில் ரூ.200 கோடி பட்ஜெட்டில் தயாரிக்க திட்டமிடப்பட்டதாகவும், பின்னர் படப்பிடிப்பு மற்றும் இதர தயாரிப்புச் செலவுகள் உயர்ந்ததால் பட்ஜெட் ரூ.400 கோடியாக அதிகரித்துள்ளதாகவும் தகவல்கள் தெரிவிக்கின்றன. இதனுடன் விளம்பரம் மற்றும் பட வெளியீட்டுக்கான செலவுகளையும் கணக்கில் எடுத்தால் மொத்த முதலீடு மேலும் உயரக்கூடும். எனவே, இதுவரை ரூ.665 கோடிக்கு வியாபாரம் நடைபெற்றுள்ளதாகக் கூறப்படும் நிலையில், படத்தின் முதலீட்டைத் திரும்பப் பெறுவதுடன் விநியோகஸ்தர்களுக்கு லாபமும் கிடைக்க வேண்டுமெனில் உலகம் முழுவதும் சுமார் ரூ.800 கோடி வசூல் செய்ய வேண்டியிருக்கும் என திரைத்துறை வர்த்தக வட்டாரங்கள் மதிப்பிடுகின்றன. இருப்பினும், ரூ.665 கோடி என்பது பல்வேறு உரிமைகள் விற்பனை தொடர்பாக வெளியாகியுள்ள தகவல்களின் அடிப்படையிலான மதிப்பீடு மட்டுமே. இது படத்தின் உறுதியான லாபத் தொகை எனக் கருத முடியாது.