படம் தயாராகிறது… Generating image…
நடிகர் சூர்யா தொடர்ந்து புதிய திரைப்படங்களில் நடிப்பதில் தீவிர கவனம் செலுத்தி வருகிறார். அந்த வரிசையில், ‘ஜெய்பீம்’ படத்தின் வெற்றிக்குப் பிறகு இயக்குநர் டி.ஜே. ஞானவேலுடன் மீண்டும் கைகோர்த்துள்ளார். சூர்யாவின் 48-வது படமாக உருவாகும் இத்திரைப்படம் குறித்த எதிர்பார்ப்பு ரசிகர்கள் மத்தியில் நாளுக்கு நாள் அதிகரித்து வருகிறது. ஹோம்பாலே பிலிம்ஸ் மற்றும் 2டி என்டர்டெயின்மென்ட் நிறுவனங்கள் இணைந்து தயாரிக்கும் இப்படத்தின் படப்பிடிப்பு தற்போது ஜப்பானில் நடைபெற்று வருகிறது. அங்கு ஒரு வாரம் படப்பிடிப்பை நடத்தத் திட்டமிட்டுள்ள படக்குழு, தொடர்ந்து அடுத்த ஒரு வாரம் பாங்காக்கில் படப்பிடிப்பை மேற்கொள்ள இருப்பதாகத் தகவல் வெளியாகியுள்ளது. படத்தின் முக்கியக் காட்சிகளை வெளிநாடுகளில் படமாக்கி வரும் இயக்குநர் மற்றும் படக்குழுவினர், எஞ்சிய படப்பிடிப்புப் பணிகளையும் விரைவாக முடிக்கத் திட்டமிட்டுள்ளனர். இப்படத்தில் சூர்யாவுக்கு ஜோடியாக கயாடு லோஹர் நடிக்கிறார். யோகி பாபு, பிரகாஷ் ராஜ், எலங்கோ குமரவேல் உள்ளிட்டோர் முக்கிய கதாபாத்திரங்களில் இடம்பெற்றுள்ளனர். மேலும், பாலிவுட் நடிகர் சஞ்சய் தத் வில்லன் கதாபாத்திரத்தில் நடிக்க உள்ளதாகவும் கூறப்படுகிறது. இப்படத்திற்கு சாய் அபயங்கர் இசையமைக்கிறார். ஏற்கெனவே ‘ஜெய்பீம்’ படத்தின் மூலம் ரசிகர்களிடமும் விமர்சகர்களிடமும் கவனம் பெற்ற சூர்யா - ஞானவேல் கூட்டணி மீண்டும் இணைந்திருப்பது படத்தின் மீதான ஆர்வத்தை அதிகரித்துள்ளது. அதிரடி மற்றும் உணர்ச்சிகரமான அம்சங்களுடன் தயாராகும் இத்திரைப்படம் பான் இந்தியா படமாக வெளியாக உள்ளது.
