விளையாட்டு துறையை மேம்படுத்துகிறார் விஜய்.. அஜித் பாராட்டு

தமிழக முதல்-அமைச்சர் விஜய் தனது பரபரப்பான பணிகளுக்கு இடையிலும் லண்டன் சென்றுள்ளார். தொழில் முதலீடுகளை ஈர்ப்பதற்காக மேற்கொண்டுள்ள இந்தப் பயணத்தின் போது, மோட்டார் ஸ்போர்ட்ஸ் தொடர்பான பல்வேறு உள்கட்டமைப்பு பணிகளையும் அவர் நேரில் பார்வையிட்டு வருகிறார். இந்த நிலையில், சில்வர்ஸ்டோனில் இன்று (சனிக்கிழமை) நடைபெற உள்ள மெச்சிலின் லீ மேன்ஸ் கார் பந்தயப் போட்டியை விஜய் தொடங்கி வைக்கிறார். இந்தப் போட்டியில் பங்கேற்கும் தனது நண்பரும், நடிகருமான அஜித்தையும் விஜய் சந்தித்து பேசியுள்ளார். இதுகுறித்து அஜித் கூறுகையில், தமிழக முதல்-அமைச்சர் விஜய் தனது பணிச்சுமைக்கு மத்தியிலும் லண்டன் வந்திருப்பதாக தெரிவித்தார். இங்கு மோட்டார் ஸ்போர்ட்ஸ் தொடர்பான நடவடிக்கைகளை அவர் பார்வையிட்டு வருவதுடன், விளையாட்டு துறையின் வளர்ச்சிக்காகவும் பல்வேறு முயற்சிகளை மேற்கொண்டு வருவதாக அஜித் குறிப்பிட்டார். மோட்டார் ஸ்போர்ட்ஸ் போன்ற விளையாட்டுகள் இந்தியாவில் மேலும் வளர வேண்டும் என்பதே தனது விருப்பம் என தெரிவித்த அஜித், தமிழகத்தில் மோட்டார் ஸ்போர்ட்ஸ் நகரம் அமைக்கப்படும் என விஜய் ஏற்கனவே அறிவித்திருப்பதையும் சுட்டிக்காட்டினார். இந்த முயற்சிகளுக்காக விஜய்க்கு தனது மனமார்ந்த வாழ்த்துகளையும் பாராட்டுகளையும் அஜித் தெரிவித்துள்ளார். சினிமாவில் வெவ்வேறு பாதைகளில் பயணித்தாலும், நிஜ வாழ்க்கையில் விஜய் மற்றும் அஜித் இடையே நல்ல நட்பு இருந்து வருவதாக கூறப்படுகிறது. இதனை உறுதிப்படுத்தும் வகையில் பல்வேறு நிகழ்வுகளும் நடந்துள்ளன. அந்த வரிசையில், அஜித் பங்கேற்கும் கார் பந்தயத்தை விஜய் தொடங்கி வைக்க இருப்பது இருவரது ரசிகர்களிடையேயும் பெரும் உற்சாகத்தை ஏற்படுத்தியுள்ளது.