“வாழ்த்துகள் சாம்பியன்ஸ்!”... இந்திய வீராங்கனைகளை பாராட்டிய சரத்குமார்

ஜப்பானின் அய்ச்சி மாகாணம் நகோயாவில் நடைபெற்று வரும் 2026 ஆசிய விளையாட்டுப் போட்டிகளில் இந்திய வீரர், வீராங்கனைகள் தொடர்ந்து பதக்கங்களை வென்று வருகின்றனர். குறிப்பாக தடகளப் போட்டிகளில் இந்திய வீராங்கனைகளின் செயல்பாடு கவனம் பெற்றுள்ளது. இந்நிலையில், இந்திய வீராங்கனைகளின் சாதனைகளை பாராட்டி நடிகர் சரத்குமார் தனது எக்ஸ் பக்கத்தில் பதிவிட்டுள்ளார். அதில், 2026 ஆசிய விளையாட்டுப் போட்டிகளில் இந்தியப் பெண் விளையாட்டு வீராங்கனைகள் சிறப்பான வெற்றிகளைப் பதிவு செய்திருப்பது பெருமைக்குரிய தருணம் என அவர் குறிப்பிட்டுள்ளார். பெண்களுக்கான 400 மீட்டர் தடை ஓட்டத்தில் கோயம்புத்தூரைச் சேர்ந்த வித்யா ராம்ராஜ், 54.75 வினாடிகளில் பந்தயத்தை நிறைவு செய்து புதிய சாதனை படைத்ததை சரத்குமார் பாராட்டியுள்ளார். இதன் மூலம், 1984 லாஸ் ஏஞ்சல்ஸ் ஒலிம்பிக்கில் பி.டி. உஷா 55.42 வினாடிகளில் பதிவு செய்திருந்த 42 ஆண்டுகால தேசிய சாதனையை வித்யா முறியடித்ததாக அவர் தெரிவித்துள்ளார். மேலும், பெண்களுக்கான 4×400 மீட்டர் தொடர் ஓட்டத்தில் கிரண், மச்செட்டிரா பூவம்மா, பிராச்சி மற்றும் வித்யா ராம்ராஜ் ஆகியோர் அடங்கிய இந்திய அணி 3:29.69 நிமிடங்களில் இலக்கை கடந்து தங்கப் பதக்கம் வென்றதையும் அவர் சுட்டிக்காட்டியுள்ளார். இந்தியாவுக்கும் தமிழ்நாட்டுக்கும் சர்வதேச அளவில் பெருமை சேர்த்துள்ள வீராங்கனைகளுக்கு மனமார்ந்த வாழ்த்துகளைத் தெரிவித்துள்ள சரத்குமார், அவர்களின் விடாமுயற்சி, அர்ப்பணிப்பு மற்றும் விளையாட்டுத் திறன் இளம் தலைமுறை விளையாட்டு வீரர்களுக்கு ஊக்கமாக அமைய வேண்டும் என தெரிவித்துள்ளார். மேலும், 2026 ஆசிய விளையாட்டுப் போட்டிகளில் இந்திய வீரர்கள் 8 தங்கம், 21 வெள்ளி, 26 வெண்கலம் என மொத்தம் 55 பதக்கங்களை வென்று நாட்டிற்கு பெருமை சேர்த்துள்ளதாகவும் அவர் குறிப்பிட்டுள்ளார். பதக்கம் வென்றவர்கள் மட்டுமின்றி இந்திய அணியின் ஒவ்வொரு உறுப்பினருக்கும் வாழ்த்துகளைத் தெரிவித்த அவர், “வாழ்த்துகள் வெற்றியாளர்களே! பாராட்டுக்கள் இந்திய அணியே!” என தனது பதிவில் தெரிவித்துள்ளார்.