படம் தயாராகிறது… Generating image…
தமிழகத்தின் பொருளாதாரத்தை 2036-ம் ஆண்டுக்குள் 1.5 டிரில்லியன் அமெரிக்க டாலர் அளவுக்கு உயர்த்த இலக்கு நிர்ணயிக்கப்பட்டுள்ளது. இதன் ஒரு பகுதியாக தமிழகத்திற்கு புதிய தொழில் முதலீடுகளை ஈர்க்கும் நோக்கில் முதல்-அமைச்சர் விஜய் இங்கிலாந்து சென்றுள்ளார். லண்டனில் நடைபெற்ற முதலீட்டு நடவடிக்கைகளின் ஒரு பகுதியாக, தமிழகத்தில் உற்பத்தி ஆலைகள், உலகளாவிய திறன் மையங்கள் மற்றும் ஆராய்ச்சி, மேம்பாட்டு வசதிகளை அமைப்பது தொடர்பாக தமிழக அரசின் வழிகாட்டி நிறுவனத்துக்கும் பல்வேறு பன்னாட்டு நிறுவனங்களுக்கும் இடையே கடந்த 14-ம் தேதி ஒப்பந்தங்கள் மேற்கொள்ளப்பட்டன. 45-க்கும் அதிகமான நாடுகளில் செயல்பட்டு வரும் ‘சம்வர்தனா மதர்சன் இன்டர்நேஷனல் லிமிடெட்’ நிறுவனம், தனது பிரிட்டன் மற்றும் ஐரோப்பிய கூட்டுநிறுவனங்களுடன் இணைந்து தமிழகத்தில் ரூ.11,000 கோடி முதலீடு செய்ய திட்டமிட்டுள்ளது. இதன் மூலம் சுமார் 7,000 பேருக்கு வேலைவாய்ப்பு உருவாகும் என தெரிவிக்கப்பட்டுள்ளது. இந்த முதலீடு சர்வதேச வாகன உற்பத்தித் துறையில் தமிழகத்தின் பங்களிப்பை மேலும் விரிவுபடுத்தும் என கூறப்படுகிறது. மேலும், ஐரோப்பாவைச் சேர்ந்த முன்னணி வாகன உதிரிபாக உற்பத்தி நிறுவனம், இந்தியாவில் தனது முதல் புதிய உற்பத்தி ஆலையை அமைக்க தமிழகத்தை தேர்வு செய்துள்ளது. இதற்காக ரூ.3,000 கோடி முதலீடு செய்வதற்கான விருப்பக் கடிதம் முதல்-அமைச்சர் விஜய்யிடம் வழங்கப்பட்டது. இதனிடையே, ஏர்ன்ஸ்ட் & யங் நிறுவனம் சென்னையில் உலகளாவிய திறன் மையத்தை அமைக்க தமிழக அரசுடன் ஒப்பந்தம் செய்துள்ளது. சென்னை மவுண்ட் - பூந்தமல்லி சாலை பகுதியில் சுமார் ரூ.1,000 கோடி முதலீட்டில் இந்த மையம் அமைக்கப்பட உள்ளது. இதன் வாயிலாக 2 ஆயிரத்துக்கும் மேற்பட்ட வேலைவாய்ப்புகள் உருவாகும் என எதிர்பார்க்கப்படுகிறது. ஸ்வீடனைச் சேர்ந்த சிக்மா டெக்னாலஜி குழுமம், எம்பெடட் சிஸ்டம்ஸ் மற்றும் டிஜிட்டல்மயமாக்கல் துறைகளில் 600 வேலைவாய்ப்புகளை உருவாக்கும் வகையில், சென்னை மற்றும் திருச்சியில் செயல்பட்டு வரும் தனது திறன் மையங்களை விரிவுபடுத்துவதற்கான ஒப்பந்தத்தில் கையெழுத்திட்டுள்ளது. அதேபோல், பிரிட்டனை தலைமையிடமாகக் கொண்ட வில்சன் பவர் சொல்யூஷன்ஸ் நிறுவனம், மேம்பட்ட மின்மாற்றிகளை தயாரிப்பதற்காக திருவள்ளூர் மாவட்டத்தில் ரூ.300 கோடி முதலீடு செய்கிறது. இதன் மூலம் 400 புதிய வேலைவாய்ப்புகள் உருவாக உள்ளன. இதுதவிர, அசோக் லேலண்ட் நிர்வாகத் தலைவர் தீரஜ் இந்துஜா, பினோலெக்ஸ் இண்டஸ்ட்ரீஸ் நிர்வாகத் தலைவர் பிரகாஷ் பி. சாப்ரி உள்ளிட்ட தொழில் நிறுவனங்களின் நிர்வாகிகளும் முதல்-அமைச்சர் விஜய்யை சந்தித்தனர். கடந்த ஆகஸ்ட் மாதம் நடைபெற்ற ‘வெற்றி’ முதலீட்டாளர்கள் மாநாட்டில் அறிவிக்கப்பட்ட ரூ.2,500 கோடி முதலீட்டின் தற்போதைய முன்னேற்றம் குறித்து அவர்கள் விளக்கினர். மேலும், தமிழகத்தில் காற்றாலை உள்ளிட்ட புதுப்பிக்கத்தக்க எரிசக்தித் துறைகளில் முதலீடுகளை அதிகரிப்பது குறித்தும் ஆலோசிக்கப்பட்டது. இந்த சந்திப்புகளின் போது பேசிய முதல்-அமைச்சர் விஜய், மேற்கொள்ளப்பட்டு வரும் முதலீடுகள் தமிழக இளைஞர்களின் எதிர்கால இலக்குகளை பிரதிபலிப்பதாக தெரிவித்தார். பிரிட்டன்-இந்தியா பொருளாதார மற்றும் வர்த்தக ஒப்பந்தம் மூலம் உருவாகும் வாய்ப்புகளை பயன்படுத்தி, தமிழகத்தில் முதலீடு செய்ய பிரிட்டன் மற்றும் ஐரோப்பிய நிறுவனங்களுக்கு அவர் அழைப்பு விடுத்தார். இதன் தொடர்ச்சியாக, பிரிட்டன் வர்த்தக நிறுவனங்களுக்கும் தமிழக ஜவுளி உற்பத்தியாளர்களுக்கும் இடையே கொள்முதல் ஒப்பந்தங்கள் மேற்கொள்ளப்பட உள்ளன. மேலும், ஓசூருக்கு பிரிட்டன் விண்வெளி மற்றும் பாதுகாப்புத் துறை பிரதிநிதிகள் வருகை தரவும், அக்டோபர் மாதத்தில் இங்கிலாந்து மேயர் ஆணையத்தின் பிரதிநிதிகள் சென்னை வரவும் நடவடிக்கைகள் மேற்கொள்ளப்பட உள்ளன. இந்த நிலையில், லண்டன் பயணத்தை நிறைவு செய்துவிட்டு முதல்-அமைச்சர் விஜய் நாளை (வியாழக்கிழமை) சென்னை திரும்புகிறார்.
