படம் தயாராகிறது… Generating image…
ராஜ் அய்யப்பா மற்றும் டெல்னா டேவிஸ் இணைந்து நடிக்கும் ‘லவ் இங்க்’ திரைப்படம் வரும் டிசம்பர் மாதம் திரையரங்குகளில் வெளியாகும் எனப் படத்தின் இயக்குநர் மேகராஜ் தாஸ் தெரிவித்துள்ளார். இப்படத்தில் ஆர்த்தி, ரவி மரியா, மைம் கோபி, பட்டிமன்றம் ராஜா, ரமா, சுபாஷினி, வினோத் முன்னா உள்ளிட்ட பலர் முக்கிய கதாபாத்திரங்களில் நடித்துள்ளனர். மேகராஜ் தாஸ் இயக்கத்தில் உருவாகும் இப்படத்தை எம்.ஆர். பிக்சர்ஸ் சார்பில் ஏ. மகேந்திரன் ஆதிகேசவன் வழங்குகிறார். தரண் குமார் இசையமைத்துள்ளார். தற்கால இளைஞர்களின் காதல் மற்றும் உறவுகளை மையமாகக் கொண்டு நகைச்சுவை கலந்த காதல் திரைப்படமாக இது உருவாகியுள்ளது. காதலர்கள் தங்களுக்குப் பிடித்தவர்களின் பெயர்களையோ அல்லது காதலைக் குறிக்கும் அடையாளங்களையோ உடலில் டாட்டூவாகப் பொறித்துக் கொள்வதையே 'லவ் இங்க்' எனக் குறிப்பிடுகின்றனர். இத்தகைய டாட்டூக்கள் காதலர்களுக்கு இடையிலான நெருக்கத்தையும் காதலையும் அதிகரிப்பதாக நம்பப்படுகிறது. இதனை மையமாகக் கொண்டு படத்தின் கதைக்களம் அமைக்கப்பட்டுள்ளது. இப்படத்தின் படப்பிடிப்பு சென்னை மற்றும் தஞ்சை பகுதிகளில் நடைபெற்றுள்ளது. நடிகர் ராஜ் அய்யப்பா, ‘வலிமை’, ‘100’ உள்ளிட்ட படங்களில் நடித்துள்ளார். மேலும், ‘உப்பு புளி காரம்’ ஓடிடி தொடரில் நடித்ததன் மூலம் கவனம் பெற்றார். டெல்னா டேவிஸ் தொலைக்காட்சித் தொடர்களில் நடித்த அனுபவம் கொண்டவர். படம் குறித்து இயக்குநர் மேகராஜ் தாஸ் கூறுகையில், தற்போதைய தலைமுறையினரின் உறவுச் சிக்கல்களையும் நவீன காதலையும் நகைச்சுவை கலந்து இப்படம் எடுத்துரைக்கும் என்றார். இளைஞர்கள் மட்டுமின்றி குடும்பத்தினரும் ஒன்றாக அமர்ந்து ரசிக்கும் வகையில் திரைப்படம் உருவாகி வருவதாகவும் தெரிவித்தார். மேலும், இதுவரை பல படங்களில் நகைச்சுவை கதாபாத்திரங்களில் நடித்துள்ள சுனில் ரெட்டி, இப்படத்தில் வில்லனாக நடித்திருப்பதாகக் குறிப்பிட்டார். தற்போது இறுதிக்கட்டப் படப்பிடிப்பு நடைபெற்று வரும் நிலையில், ‘லவ் இங்க்’ திரைப்படம் டிசம்பர் மாதம் வெளியாகும் என்றும் அவர் தெரிவித்தார்.
