படம் தயாராகிறது… Generating image…
வால்மீகி எழுதிய ராமாயணக் காவியத்தை மையமாகக் கொண்டு உருவாகி வரும் ‘ராமாயணா’ திரைப்படத்தின் புதிய டிரெய்லர் நேற்று வெளியானது. இதில் ராமர் மற்றும் ராவணன் இடையேயான மோதல் பிரம்மாண்டமான காட்சிகளுடன் இடம்பெற்றுள்ளது. இயக்குநர் நிதேஷ் திவாரி இயக்கத்தில் பெரும் பொருட்செலவில் தயாராகி வரும் இப்படம், இந்தியத் திரையுலகில் அதிக எதிர்பார்ப்பை ஏற்படுத்தியுள்ளது. இதில் ரன்பீர் கபூர் ராமராகவும், சாய் பல்லவி சீதையாகவும், யாஷ் ராவணனாகவும் நடிக்கின்றனர். மேலும், ரகுல் பிரீத் சிங் சூர்ப்பனகையாகவும், ரவி துபே லட்சுமணனாகவும், சன்னி தியோல் அனுமனாகவும் நடித்துள்ளனர். இரண்டு பாகங்களாக வெளியாகும் ‘ராமாயணா’ இரண்டு பாகங்களாக உருவாகும் இப்படத்தின் முதல் பாகம் 2026 நவம்பர் 5-ம் தேதி தீபாவளியை முன்னிட்டு வெளியாகும் என அறிவிக்கப்பட்டுள்ளது. இரண்டாம் பாகம் 2027-ம் ஆண்டு தீபாவளிக்கு திரைக்கு வரவுள்ளது. தமிழ், தெலுங்கு, கன்னடம், மலையாளம் உள்ளிட்ட பல மொழிகளில் பான் இந்தியா திரைப்படமாக இப்படம் வெளியாகிறது. இப்படத்திற்கு ஆஸ்கர் விருது பெற்ற இந்திய இசையமைப்பாளர் ஏ.ஆர். ரகுமான் மற்றும் ஹாலிவுட் இசையமைப்பாளர் ஹான்ஸ் ஜிம்மர் ஆகியோர் இணைந்து இசையமைத்து வருகின்றனர். ஏற்கெனவே வெளியான படத்தின் கிளிம்ப்ஸ் ரசிகர்களின் கவனத்தை ஈர்த்த நிலையில், தற்போது புதிய டிரெய்லரும் எதிர்பார்ப்பை அதிகரித்துள்ளது. ராமர் - ராவணன் மோதலை வெளிப்படுத்தும் டிரெய்லர் 2 நிமிடங்கள் 36 விநாடிகள் நீளமுள்ள இந்த டிரெய்லரில், தீமையை அழித்து ராவணனை வீழ்த்துவதாக ராமர் சபதம் எடுக்கும் காட்சிகள் இடம்பெற்றுள்ளன. ரன்பீர் கபூர் ராமராகத் தோன்றும் காட்சிகள், கதையின் முக்கியமான மோதலை முன்னிறுத்தும் வகையில் அமைந்துள்ளன. மறுபுறம், மூன்று உலகங்களையும் ஆளும் வல்லமை கொண்டவனாக யாஷ் ஏற்றுள்ள ராவணன் கதாபாத்திரம் சித்தரிக்கப்பட்டுள்ளது. தேவர்களின் படையுடன் ராவணன் போரிடும் காட்சிகளும், சீதையைக் கடத்திச் செல்லும் சம்பவத்தின்போது ஜடாயு அவரை எதிர்த்துப் போராடும் காட்சிகளும் டிரெய்லரில் இடம்பெற்றுள்ளன. இதனுடன், ராமர் மற்றும் சீதை இடையேயான உணர்ச்சிகரமான தருணங்களும் கவனம் பெறுகின்றன. ராமர் ராட்சதர்களுடன் மோதும் காட்சிகள், பிரம்மாண்டமான போர் காட்சிகள் மற்றும் மேம்பட்ட கிராபிக்ஸ் காட்சிகள் எனப் பல அம்சங்கள் டிரெய்லரில் இடம்பெற்றுள்ளன. படத்தின் காட்சியமைப்புகளும், ராமர் - ராவணன் இடையிலான மோதலை மையமாகக் கொண்ட காட்சிகளும் ரசிகர்களின் எதிர்பார்ப்பை மேலும் அதிகரித்துள்ளன.
