படம் தயாராகிறது… Generating image…
நாமக்கல் மாவட்டம் ராசிபுரம் மற்றும் சுற்றுவட்டாரப் பகுதிகளில் நேற்று (ஞாயிற்றுக்கிழமை) இரவு பலத்த காற்று, இடி, மின்னலுடன் கனமழை பெய்தது. 2 மணி நேரத்திற்கும் மேலாக நீடித்த மழையால் ராசிபுரம் நகரின் பல பகுதிகளில் மழைநீர் தேங்கியது. ராசிபுரம் பழைய பேருந்து நிலையம் அருகே அமைந்துள்ள அரசு மருத்துவமனை வளாகத்திற்குள் சாக்கடை நீர் கலந்த மழைநீர் பெருக்கெடுத்து புகுந்தது. இதனால் உள்நோயாளிகள் பிரிவு, பெண்கள் வார்டு, பிரசவ வார்டு உள்ளிட்ட பகுதிகளில் முழங்கால் அளவுக்கு தண்ணீர் தேங்கியது. மருத்துவமனைக்குள் திடீரென வெள்ளநீர் சூழ்ந்ததால் நோயாளிகளும், அவர்களது உறவினர்களும் பெரும் சிரமத்திற்கு உள்ளாகினர். நிலைமையை கருத்தில் கொண்டு மருத்துவமனை ஊழியர்கள் சக்கர நாற்காலிகளின் உதவியுடன் நோயாளிகள் மற்றும் கர்ப்பிணிகளை பாதுகாப்பான அறைகளுக்கு மாற்றினர். இதனிடையே புதுப்பாளையம் சாலை மற்றும் புதிய பேருந்து நிலையம் பகுதிகளிலும் மழைநீர் தேங்கியதால் போக்குவரத்து பாதிக்கப்பட்டதுடன், பொதுமக்களின் இயல்பு வாழ்க்கையும் முடங்கியது. மழைக்காலங்களில் அரசு மருத்துவமனைக்குள் தண்ணீர் புகுவது தொடர்ந்து நடைபெற்று வருவதாக அப்பகுதி மக்கள் தெரிவித்தனர். இதற்கு நிரந்தர தீர்வு காணும் வகையில் மாவட்ட நிர்வாகம் உடனடியாக வெள்ளத்தடுப்பு நடவடிக்கைகளை மேற்கொள்ள வேண்டும் என்றும் அவர்கள் கோரிக்கை விடுத்துள்ளனர்.
