ரீ-எண்ட்ரி கொடுக்கும் நடிகர் ஜீவன்

நீண்ட இடைவெளிக்குப் பிறகு நடிகர் ஜீவன் மீண்டும் திரையுலகில் கால்பதித்துள்ளார். ‘லவ்வர் பாய்’ திரைப்படத்தின் மூலம் அவர் மீண்டும் நடிப்பில் கவனம் செலுத்தத் தொடங்கியுள்ளார். தமிழ் சினிமாவில் வித்தியாசமான கதாபாத்திரங்களைத் தேர்வு செய்து நடித்தவர் ஜீவன். கவுதம் வாசுதேவ் மேனன் இயக்கிய ‘காக்க காக்க’ படத்தில் பாண்டியா என்ற வில்லன் கதாபாத்திரத்தில் நடித்து கவனம் பெற்றார். தொடர்ந்து ‘திருட்டுப்பயலே’ படத்தில் கதாநாயகனாக நடித்ததன் மூலம் ரசிகர்களிடையே வரவேற்பைப் பெற்றார். இதையடுத்து ‘நான் அவனில்லை’, ‘யுனிவர்சிட்டி’, ‘மச்சக்காரன்’, ‘அதிபர்’ உள்ளிட்ட படங்களில் நடித்தார். அவரது நடிப்பில் வெளியான கடைசி படமாக ‘பாம்பாட்டம்’ அமைந்தது. தொடர்ந்து நடித்த படங்கள் எதிர்பார்த்த அளவில் கவனம் பெறாத நிலையில், ஜீவன் சினிமாவை விட்டு விலகி அமெரிக்கா சென்றார். இந்நிலையில், நீண்ட இடைவெளிக்குப் பிறகு ‘லவ்வர் பாய்’ திரைப்படத்தின் மூலம் ஜீவன் மீண்டும் நடிப்புக்கு திரும்பியுள்ளார். அசோக் குமார் இயக்கும் இப்படத்தில் அர்ஜித் சங்கர், கிரித்தி ஷெட்டி உள்ளிட்டோர் முக்கிய கதாபாத்திரங்களில் நடிக்கின்றனர். பேஷன் ஸ்டுடியோஸ் மற்றும் கேவிஎன் புரொடக்ஷன்ஸ் இணைந்து தயாரிக்கும் இப்படத்தில் ஜீவன் மீண்டும் வில்லன் கதாபாத்திரத்தில் நடிப்பதாக கூறப்படுகிறது. அவர் படப்பிடிப்பில் பங்கேற்ற வீடியோவை படக்குழு சமூக வலைதளத்தில் பகிர்ந்து, ஜீவனை வரவேற்றுள்ளது.