முதல்வரின் காலை உணவு திட்டம் பெயர் மாற்றம் - த.வெ.க. அரசு

முன்னாள் முதல்-அமைச்சர் மு.க. ஸ்டாலின் தலைமையிலான தி.மு.க. ஆட்சியில் அறிமுகப்படுத்தப்பட்ட ‘முதல்வரின் காலை உணவு திட்டம்’ இனி ‘பெருந்தலைவர் காமராஜர் காலை உணவு திட்டம்’ என்ற பெயரில் செயல்படும் என த.வெ.க. அரசு அறிவித்துள்ளது. அரசுத் தொடக்கப் பள்ளிகளில் 1 முதல் 5-ஆம் வகுப்பு வரை பயிலும் மாணவர்களுக்காக இந்த காலை உணவு திட்டம் கடந்த 2022 செப்டம்பர் 15-ஆம் தேதி, அண்ணா பிறந்தநாளையொட்டி அப்போது முதல்-அமைச்சராக இருந்த மு.க. ஸ்டாலினால் தொடங்கப்பட்டது. பின்னர், 2023 ஆகஸ்ட் 25-ஆம் தேதி இந்தத் திட்டம் அரசு உதவி பெறும் தொடக்கப் பள்ளிகளுக்கும் விரிவுபடுத்தப்பட்டது. தற்போது தமிழகம் முழுவதும் சுமார் 17.55 லட்சம் மாணவர்கள் இந்தத் திட்டத்தின் மூலம் பயன்பெற்று வருகின்றனர். தமிழகத்தில் ஆட்சி மாற்றத்திற்குப் பிறகு, இந்த காலை உணவு திட்டத்தை 6 முதல் 8-ஆம் வகுப்பு வரை படிக்கும் மாணவர்களுக்கும் விரிவுபடுத்த அரசு முடிவு செய்துள்ளது. இதன்படி, தன் கொள்கைத் தலைவரான தந்தை பெரியாரின் பிறந்தநாளான செப்டம்பர் 17 முதல் திட்டம் அமல்படுத்தப்படும் என்று முதல்-அமைச்சர் விஜய் அறிவித்துள்ளார். இந்த விரிவாக்கத்தின் மூலம் மேலும் 15 லட்சம் மாணவர்கள் பள்ளியிலேயே காலை உணவு பெறுவார்கள். சமையலறை மற்றும் தேவையான உபகரணங்கள் உள்ள பள்ளிகளில் செப்டம்பர் 17 முதல் திட்டம் செயல்படுத்தப்படும். மற்ற பள்ளிகளில் ஒரு மாதத்திற்குள் திட்டம் தொடங்கப்படும் என்றும் அரசு தெரிவித்துள்ளது. இதன் மூலம் மாநிலம் முழுவதும் மொத்தம் 34.36 லட்சம் மாணவர்கள் காலை உணவு திட்டத்தின் பயனை பெறுவார்கள் என கூறப்படுகிறது. இதனுடன், இதுவரை ‘முதல்வரின் காலை உணவு திட்டம்’ என்ற பெயரில் செயல்பட்டு வந்த இந்தத் திட்டத்திற்கு ‘பெருந்தலைவர் காமராஜர் காலை உணவு திட்டம்’ என்று புதிய பெயர் வழங்கப்பட்டுள்ளது. தமிழகத்தில் பள்ளி மாணவர்களுக்கான உணவுத் திட்டங்களில் பல்வேறு காலகட்டங்களில் முக்கிய மாற்றங்கள் செய்யப்பட்டுள்ளன. ஏழை மாணவர்களுக்கான மதிய உணவு திட்டத்தை பெருந்தலைவர் காமராஜர் அறிமுகப்படுத்தினார். பின்னர், 1982-ஆம் ஆண்டு முதல்-அமைச்சராக இருந்த எம்.ஜி.ஆர்., அனைத்து மாணவர்களுக்கும் சத்துணவு வழங்கும் திட்டத்தை அறிவித்தார். அதனைத் தொடர்ந்து கலைஞர் கருணாநிதி தலைமையிலான ஆட்சியில் சத்துணவுடன் முட்டையும் வழங்கும் நடைமுறை அறிமுகப்படுத்தப்பட்டது. பின்னர் மு.க. ஸ்டாலின் தலைமையிலான ஆட்சியில் 1 முதல் 5-ஆம் வகுப்பு மாணவர்களுக்காக காலை உணவு திட்டம் தொடங்கப்பட்டது. தற்போது முதல்-அமைச்சர் விஜய் தலைமையிலான அரசு அந்தத் திட்டத்தை 6 முதல் 8-ஆம் வகுப்பு மாணவர்களுக்கும் விரிவுபடுத்தியுள்ளதுடன், அதற்கு ‘பெருந்தலைவர் காமராஜர் காலை உணவு திட்டம்’ என்ற புதிய பெயரையும் வழங்கியுள்ளது.