மிசா என்பது பஞ்சு மெத்தையில் உருள்வதல்ல; சிறையில் ரத்தம் சிந்திய நிஜம்: திமுக பதிலடி

சட்டப்பேரவையில் மிசா குறித்து முதல்-அமைச்சர் விஜய் பேசியதற்கு திமுகவினர் உள்ளிட்ட பல்வேறு தரப்பினரும் எதிர்ப்பு தெரிவித்து வருகின்றனர். இதையடுத்து, மிசா காலத்தில் சிறையில் நடைபெற்ற சம்பவங்கள் குறித்து திமுக தலைவர் மு.க.ஸ்டாலின் இன்று காலை வீடியோ வெளியிட்டு விளக்கம் அளித்தார். இதற்கு பதிலளித்த தவெக ஐடி விங், பல ஆண்டுகளாக உருவாக்கப்பட்டதாகக் கூறப்படும் ‘சிறை சென்ற தியாகி’ என்ற பிம்பம் தகர்ந்ததால் திமுக தரப்பில் பதற்றம் ஏற்பட்டுள்ளதாக விமர்சித்திருந்தது. இதற்கு பதிலடி கொடுக்கும் வகையில் திமுக ஐடி விங் கடுமையான விமர்சனங்களுடன் பதிவொன்றை வெளியிட்டுள்ளது. அந்தப் பதிவில், திமுகவின் வரலாறு உழைப்பு மற்றும் தியாகத்தின் அடிப்படையில் உருவானது என்றும், அதனை யாருடைய விமர்சனங்களாலும் மறைத்துவிட முடியாது என்றும் தெரிவிக்கப்பட்டுள்ளது. தவெக தரப்பில் பரப்பப்படும் பொய்களுக்கு அரசியல் நாகரிகத்துடன் மு.க.ஸ்டாலின் விளக்கம் அளித்திருப்பது, அந்த விமர்சகர்களுக்காக அல்ல என்றும், அவர்களின் கருத்துகளை நம்பி பொதுமக்கள் மீண்டும் ஏமாறக் கூடாது என்பதற்காகவே என்றும் திமுக ஐடி விங் கூறியுள்ளது. வரலாறு மற்றும் தியாகத்தின் உண்மையான பொருளை அறியாமல் சமூக வலைதளங்களில் பொய்களையும் அவதூறுகளையும் பரப்புவதாக தவெக மீது திமுக ஐடி விங் குற்றம்சாட்டியுள்ளது. சினிமா பின்னணியில் வளர்ந்த ஒருவருக்கு, மிசா காலத்தில் சிறைக் கொட்டடிகளில் கைதிகள் அனுபவித்த கொடுமைகளையும், போலீசாரின் தாக்குதலில் அவர்கள் சிந்திய ரத்தத்தின் வலியையும் எவ்வாறு புரிந்துகொள்ள முடியும் என்றும் கேள்வி எழுப்பியுள்ளது. மேலும், பத்திரிகையாளர்களை நேரடியாக சந்திப்பதைத் தவிர்ப்பதாகவும், சட்டப்பேரவையில் எழுப்பப்பட்ட கேள்விக்கு பதிலளிப்பதற்காக பல நாட்கள் தயாராகி, பின்னர் கேமரா முன்பு உணர்ச்சிவசப்பட்டு பேசுவதாகவும் திமுக ஐடி விங் விமர்சித்துள்ளது. மிசா கால தியாகம் என்பது திரைப்படக் காட்சியைப் போன்ற ஒன்றல்ல என்றும், கொள்கையில் உறுதியாக இருந்து சிறைக் கம்பிகளுக்குள் துன்பங்களை எதிர்கொண்டு ரத்தம் சிந்திய உண்மை வரலாறு என்றும் அந்தப் பதிவு குறிப்பிட்டுள்ளது. அதேபோல், அவசரநிலை காலத்தில் மிசா சட்டத்தின் கீழ் நடைபெற்ற கொடுமைகளை பதிவு செய்த வரலாற்று ஆவணமான இஸ்மாயில் கமிஷன் அறிக்கையை படித்து புரிந்துகொள்ள வேண்டும் என்றும் தவெக தரப்பை திமுக ஐடி விங் சாடியுள்ளது. மறைந்த முன்னாள் முதல்-அமைச்சர் மு.கருணாநிதி அணிந்திருந்த ‘மஞ்சள் துண்டு’ சமூகநீதியையும் சுயமரியாதையையும் பிரதிபலிக்கும் அடையாளம் எனவும் பதிவில் தெரிவிக்கப்பட்டுள்ளது. மேலும், கருணாநிதியை விமர்சிக்கும் வகையில் பயன்படுத்தப்பட்ட ‘கட்டுமரம்’ என்ற விமர்சனத்திற்கும் திமுக தரப்பு பதிலளித்துள்ளது. இந்திய அரசியலில் ஏற்பட்ட பல்வேறு நெருக்கடிகளை எதிர்கொண்டு தமிழ்நாட்டை காத்த வரலாறு கருணாநிதிக்கு இருப்பதாகவும், அதில் எமர்ஜென்சி கால மிசா சிறைவாசமும் ஒன்றாகும் என்றும் கூறப்பட்டுள்ளது. கொள்கை மற்றும் சித்தாந்தம் இல்லாமல் தியாகிகளை அவமதித்து அரசியல் செய்ய முயன்றால், தவெக நிலைத்திருக்க முடியாது என்றும் திமுக ஐடி விங் விமர்சித்துள்ளது. இறுதியாக, எமர்ஜென்சி கால மிசா சிறைவாசம் தொடர்பான வரலாற்று ஆதாரங்கள் தங்களிடம் இருப்பதாகக் குறிப்பிட்டுள்ள திமுக ஐடி விங், அந்த ஆவணங்களில் இடம்பெற்றுள்ள பதிவுகள் மூலம் உண்மையை மக்கள் அறிந்துகொள்ள முடியும் என்றும் தெரிவித்துள்ளது. மிசா கால தியாகத்தை கேலி செய்வது ஏற்றுக்கொள்ள முடியாதது என்றும் அந்தப் பதிவில் கூறப்பட்டுள்ளது.