படம் தயாராகிறது… Generating image…
தீபாவளி பண்டிகையின்போது மும்பையின் பல்வேறு பகுதிகளில் அடுத்தடுத்து தீ விபத்துகள் ஏற்பட்டதைத் தொடர்ந்து, ராக்கெட் மற்றும் வானில் பறந்து சென்று வெடிக்கும் வகையிலான பட்டாசுகளைப் பயன்படுத்த மும்பை பேரிடர் மேலாண்மை ஆணையம் தடை விதித்துள்ளது. இந்த உத்தரவு குடியிருப்புக் கட்டடங்கள், வீடுகளின் மொட்டை மாடிகள், பால்கனிகள் மற்றும் குடிசைப் பகுதிகள் என நகரின் அனைத்துப் பகுதிகளுக்கும் பொருந்தும் என அறிவிக்கப்பட்டுள்ளது. தீபாவளி இரவில் மட்டும் மும்பையின் வெவ்வேறு இடங்களில் மூன்று பெரிய தீ விபத்துகள் நிகழ்ந்துள்ளன. இந்தச் சம்பவங்களில் குடிசைகள், கடைகள் மற்றும் வாகனப் பழுதுபார்க்கும் நிலையம் உள்ளிட்டவை தீக்கிரையாகி சேதமடைந்தன. இந்தச் சம்பவங்களைத் தொடர்ந்து, மும்பை கூடுதல் மாநகராட்சி ஆணையர் பிரஜக்தா வர்மா-லவங்கரே உத்தரவின் பேரில் பட்டாசுகளுக்கான கட்டுப்பாடு அமல்படுத்தப்பட்டுள்ளது. ராக்கெட் மற்றும் வானவேடிக்கை பட்டாசுகள் வெடிக்கும்போது அவை வீடுகளின் மேற்கூரைகள், பால்கனிகள், ஜன்னல்கள் அல்லது தீப்பற்றக்கூடிய பொருட்கள் மீது விழ வாய்ப்புள்ளது. இதனால் தீ விபத்துகள் ஏற்படும் அபாயம் இருப்பதைக் கருத்தில் கொண்டு இந்த நடவடிக்கை எடுக்கப்பட்டுள்ளதாக உத்தரவில் விளக்கப்பட்டுள்ளது. இந்தத் தடை நவம்பர் 9ஆம் தேதி முதல் நவம்பர் 25ஆம் தேதி இரவு 11.59 மணி வரை அமலில் இருக்கும் எனத் தெரிவிக்கப்பட்டுள்ளது.
