படம் தயாராகிறது… Generating image…
மதுரை ஆனையூர் அருகே காணாமல் போன 11-ம் வகுப்பு மாணவர் கழிவுநீர் குட்டையில் சடலமாக மீட்கப்பட்ட சம்பவம் அதிர்ச்சியையும், வேதனையையும் ஏற்படுத்தியுள்ளதாக முன்னாள் தமிழ்நாடு காங்கிரஸ் கமிட்டி தலைவர் செல்வப்பெருந்தகை தெரிவித்துள்ளார். இதுதொடர்பாக அவர் தனது எக்ஸ் தளத்தில் வெளியிட்ட பதிவில், மாணவரின் மரணம் தொடர்பாக காவல்துறை எந்தவித பாரபட்சமும் இல்லாமல் விரைந்து விசாரணை நடத்தி உண்மையை வெளிக்கொண்டு வர வேண்டும் என வலியுறுத்தியுள்ளார். மாணவரை அவரது பெற்றோர் மற்றும் குடும்பத்தினர் தேடி வந்த நிலையில், அவர் சடலமாக மீட்கப்பட்டது மிகவும் துயரமான சம்பவம் என செல்வப்பெருந்தகை குறிப்பிட்டுள்ளார். மேலும், உடற்கூறு ஆய்வில் மாணவர் தாக்கப்பட்டு கொலை செய்யப்பட்டிருக்கலாம் என்பதற்கான தடயங்கள் கிடைத்துள்ளதாக வெளியாகியுள்ள தகவல்கள் கவலை அளிப்பதாகவும் தெரிவித்துள்ளார். மாணவரின் மரணத்துக்கான காரணம் என்ன, அவர் எவ்வாறு உயிரிழந்தார், அவரை தாக்கியது யார், இந்த சம்பவத்தில் வேறு யாருக்காவது தொடர்பு உள்ளதா என்பன உள்ளிட்ட அனைத்து கோணங்களிலும் விசாரணை நடத்தப்பட வேண்டும் என அவர் கூறியுள்ளார். இந்த வழக்கில் அரசியல் தலையீடு அல்லது செல்வாக்குக்கு இடமளிக்காமல், அறிவியல் அடிப்படையிலான விசாரணையை காவல்துறை மேற்கொள்ள வேண்டும் என்றும் செல்வப்பெருந்தகை வலியுறுத்தியுள்ளார். குற்றம் நிரூபிக்கப்பட்டால், சம்பந்தப்பட்டவர்கள் யாராக இருந்தாலும் அவர்கள் மீது சட்டப்படி கடுமையான நடவடிக்கை எடுக்கப்பட்டு அதிகபட்ச தண்டனை பெற்றுத்தர வேண்டும் என்றும் தெரிவித்துள்ளார். இளம் மாணவர்களின் உயிர் மற்றும் பாதுகாப்புக்கு அரசு, காவல்துறை உரிய முக்கியத்துவம் அளிக்க வேண்டும் என்றும், எதிர்காலத்தில் இதுபோன்ற துயர சம்பவங்கள் நடைபெறாமல் பள்ளி மாணவர்களின் பாதுகாப்பை உறுதி செய்ய தேவையான நடவடிக்கைகளை அரசு உடனடியாக மேற்கொள்ள வேண்டும் என்றும் அவர் கேட்டுக்கொண்டுள்ளார். மேலும், உயிரிழந்த மாணவரின் குடும்பத்தினருக்கு ஆழ்ந்த இரங்கலைத் தெரிவித்த செல்வப்பெருந்தகை, இந்த மரணத்துக்கு காரணமானவர்கள் யாராக இருந்தாலும் அவர்களை சட்டத்தின் முன் நிறுத்தி கடுமையான தண்டனை வழங்க வேண்டும் என வலியுறுத்தியுள்ளார்.
