மங்கைமடம் வீர நரசிம்ம பெருமாள் கோவிலில் பிரம்மோற்சவம்: திருத்தேரோட்டத்தில் திரளான பக்தர்கள் பங்கேற்பு

மயிலாடுதுறை மாவட்டம், சீர்காழி அருகிலுள்ள மங்கைமடம் கிராமத்தில் அமைந்துள்ள வீர நரசிம்ம பெருமாள் கோவில், பஞ்ச நரசிம்மர் திருத்தலங்களில் ஒன்றாக சிறப்புப் பெற்றது. பழங்காலத்தில் திருமங்கை ஆழ்வார் இத்தலத்தில் உள்ள நரசிம்ம பெருமாளை தினமும் வழிபட்டு, பெண்களுக்கு அன்னதானம் வழங்கியதாகக் கூறப்படுவதால், இவ்வூர் “மங்கையர் மடம்” என அழைக்கப்பட்டதாக வரலாறு தெரிவிக்கிறது. மேலும், குலசேகர ஆழ்வார், பூதத்தாழ்வார் உள்ளிட்ட ஆழ்வார்கள் இத்தலப் பெருமாளை போற்றி பாசுரங்கள் பாடியுள்ளனர். இந்தத் தலத்தில் வழிபட்டால் பல்வேறு தோஷங்கள் நீங்கும் என புராண குறிப்புகளிலும் கூறப்பட்டுள்ளது.இக்கோவிலின் ஆண்டு பிரம்மோற்சவ விழா கடந்த வாரம் கொடியேற்றத்துடன் தொடங்கியது. விழா நாட்களில் தினந்தோறும் சிறப்பு பூஜைகள் மற்றும் பல்வேறு வாகன சேவைகள் நடைபெற்று வருகின்றன. கடந்த திங்கட்கிழமை இரவு நடைபெற்ற திருக்கல்யாண உற்சவத்தை முன்னிட்டு, வீர நரசிம்மர் மற்றும் தாயாருக்கு சிறப்பு அபிஷேகமும் ஆராதனையும் நடைபெற்றது.அதனைத் தொடர்ந்து உற்சவர் திருக்கல்யாண மண்டபத்தில் எழுந்தருளினர். கோவிலின் பரம்பரை ஸ்தானிக அர்ச்சகர் பாலாஜி பட்டர் தலைமையில் வைதீக முறைகளின்படி திருமண சடங்குகள் நடைபெற்றன. பின்னர் மாங்கல்யதாரணம் நடைபெற்று திருக்கல்யாண உற்சவம் சிறப்பாக நிறைவுற்றது. இதில் ஏராளமான பக்தர்கள் கலந்து கொண்டு சுவாமி தரிசனம் செய்தனர். தொடர்ந்து புஷ்ப பல்லாக்கில் வீர நரசிம்ம பெருமாள் வீதியுலா வந்து பக்தர்களுக்கு அருள்பாலித்தார்.பிரம்மோற்சவத்தின் 9-ஆம் நாள் நிகழ்வான திருத்தேரோட்டம் இன்று விமரிசையாக நடைபெற்றது. இதையொட்டி செங்கமலவல்லி தாயாருடன் வீர நரசிம்ம பெருமாள் கோவிலில் இருந்து புறப்பட்டு திருத்தேரில் எழுந்தருளினார். சிறப்பு பூஜைகள் மற்றும் மகா தீபாராதனைக்குப் பிறகு தேரோட்டம் தொடங்கப்பட்டது. நான்கு முக்கிய வீதிகள் வழியாக தேர் வலம் வந்தபோது, பக்தர்கள் தங்கள் வீடுகளின் முன்பு அர்ச்சனை செய்து ஆரத்தி எடுத்து சுவாமியை வழிபட்டனர்.