புழல், தேனியைத் தொடர்ந்து கோவை சிறையிலும் கைதி தப்பியோட்டம்... உதயநிதி கடும் விமர்சனம்

தமிழகத்தில் அடுத்தடுத்து சிறைகளில் இருந்து கைதிகள் தப்பிச் செல்லும் சம்பவங்கள் அரசியல் வட்டாரத்தில் விவாதத்தை ஏற்படுத்தியுள்ளன. புழல், தேனி சிறைகளைத் தொடர்ந்து கோவை மத்தியச் சிறையில் இருந்தும் கைதி ஒருவர் தப்பியோடியுள்ளார். இந்தச் சம்பவங்களை முன்வைத்து தமிழக அரசின் நிர்வாகத்தை உதயநிதி ஸ்டாலின் கடுமையாக விமர்சித்துள்ளார். இதுதொடர்பாக சட்டமன்ற எதிர்க்கட்சித் தலைவரான உதயநிதி ஸ்டாலின் தனது எக்ஸ் சமூக வலைத்தளப் பக்கத்தில் வெளியிட்டுள்ள பதிவில் கூறியிருப்பதாவது: புழல், தேனி சிறைகளைத் தொடர்ந்து தற்போது கோவை மத்தியச் சிறையில் இருந்தும் கைதி ஒருவர் தப்பிச் சென்றுள்ளார். அடுத்து பாளையங்கோட்டையா அல்லது சேலமா என கைதிகள் குலுக்கல் முறையில் தேர்வு செய்து தப்பிச் செல்லும் நிலைக்கு ஆட்சியின் செயல்பாடுகள் இருப்பதாக அவர் விமர்சித்துள்ளார். மேலும், இடைத்தேர்தல் நடைபெறும் தொகுதிகளுக்கு முதலமைச்சர் தோல்வி அச்சத்தில் சென்று கொண்டிருப்பதாகவும், மறுபுறம் அரசின் நிர்வாகத்தின் மீது நம்பிக்கையின்றி கைதிகள் சிறைகளில் இருந்து தப்பிச் செல்வதாகவும் அவர் தனது பதிவில் குறிப்பிட்டுள்ளார். அரசு அதிகாரிகள் மீது நடவடிக்கை எடுக்க வேண்டிய நிலை ஏற்பட்டால், முதலமைச்சரே தனக்குத் தானே பணியிடமாற்றம் அல்லது இடைநீக்க நடவடிக்கை எடுத்துக்கொள்ள வேண்டியிருக்கும் என்றும் அவர் விமர்சித்துள்ளார். அரசின் மெத்தனமான செயல்பாடுகளால் தமிழக மக்களின் பாதுகாப்பு தொடர்ந்து கேள்விக்குறியாகி வருவதாகக் கூறிய உதயநிதி ஸ்டாலின், இதற்கு தனது கடும் கண்டனத்தையும் தெரிவித்துள்ளார். இவ்வாறு அந்தப் பதிவில் அவர் குறிப்பிட்டுள்ளார்.