பயங்கரவாதத்தால் பாதிக்கப்பட்டவர்களை நினைவுகூரும் சர்வதேச நினைவு நாள் இன்று

பயங்கரவாதத் தாக்குதல்களில் உயிரிழந்தவர்களையும், அதனால் பாதிக்கப்பட்டவர்களையும் நினைவுகூரும் வகையில் ஒவ்வொரு ஆண்டும் ஆகஸ்ட் 21-ஆம் தேதி சர்வதேச நினைவு நாள் கடைப்பிடிக்கப்படுகிறது. பாதிக்கப்பட்டவர்களின் உரிமைகள் மற்றும் கண்ணியத்தை பாதுகாப்பதுடன், அவர்களுக்கு ஆதரவாக குரல் கொடுப்பதன் அவசியத்தையும் இந்த நாள் எடுத்துரைக்கிறது.2017-ஆம் ஆண்டு நியூயார்க்கில் உள்ள ஐ.நா. தலைமையகத்தில் நடைபெற்ற பொதுச்சபைக் கூட்டத்தில், பயங்கரவாதத்தால் உயிரிழந்தவர்களுக்கு அஞ்சலி செலுத்தவும், பாதிக்கப்பட்டவர்களுக்கு தேவையான உதவிகளை வழங்குவதற்கான நடவடிக்கைகளை வலியுறுத்தவும் ஆகஸ்ட் 21-ஆம் தேதியை சர்வதேச நினைவு நாளாக அறிவிக்கும் முடிவு எடுக்கப்பட்டது.ஐ.நா. பொதுச்சபை 72/165 என்ற தீர்மானத்தின் மூலம் இந்த நாளை அதிகாரப்பூர்வமாக நிறுவியது. பயங்கரவாதத் தாக்குதல்களில் உயிரிழந்தவர்களை நினைவுகூர்வதோடு, மனித உரிமைகள் மற்றும் அடிப்படை சுதந்திரங்களை பாதுகாக்க வேண்டியதன் முக்கியத்துவத்தையும் இத்தினம் வலியுறுத்துகிறது.பயங்கரவாதத்தால் பாதிக்கப்பட்டவர்களுக்கு உரிய நீதி கிடைப்பதை உறுதி செய்வதும், அவர்களுக்கு தேவையான உளவியல் மற்றும் சமூக ஆதரவை வழங்குவதும் அவசியம் என்பதை இந்த நாள் நினைவூட்டுகிறது. மேலும், பாதிக்கப்பட்டவர்களின் குரல்கள் உலகளவில் கவனிக்கப்படுவதுடன், அவர்களின் உரிமைகள் மற்றும் கண்ணியம் பாதுகாக்கப்பட வேண்டியதன் முக்கியத்துவத்தையும் எடுத்துக்காட்டுகிறது.