படம் தயாராகிறது… Generating image…
பஞ்சாப் சட்டசபை தேர்தலை முன்னிட்டு, ஆம் ஆத்மி கட்சி தனது முதல் கட்ட வேட்பாளர் பட்டியலை வெளியிட்டுள்ளது. இதில், தற்போதைய முதல்-மந்திரி பகவந்த் மான் மீண்டும் துரி சட்டமன்ற தொகுதியில் போட்டியிடுவார் என அறிவிக்கப்பட்டுள்ளது. பஞ்சாப் மாநிலத்தில் பகவந்த் மான் தலைமையிலான ஆம் ஆத்மி கட்சியின் ஆட்சி நடைபெற்று வருகிறது. மொத்தம் 117 சட்டமன்ற தொகுதிகளைக் கொண்ட இம்மாநிலத்தில், அடுத்த ஆண்டு பிப்ரவரி அல்லது மார்ச் மாதத்தில் தேர்தல் நடைபெற வாய்ப்புள்ளதாக எதிர்பார்க்கப்படுகிறது. இந்நிலையில், தேர்தலில் போட்டியிடும் வேட்பாளர்களைத் தேர்வு செய்வது தொடர்பாக, டெல்லியில் உள்ள அரவிந்த் கெஜ்ரிவாலின் இல்லத்தில் நேற்று கட்சியின் உயர்மட்ட ஆலோசனைக் கூட்டம் நடைபெற்றது. இதில் ஆம் ஆத்மி தேசிய ஒருங்கிணைப்பாளர் அரவிந்த் கெஜ்ரிவால், பஞ்சாப் முதல்-மந்திரி பகவந்த் மான், மாநிலப் பொறுப்பாளர் மணிஷ் சிசோடியா உள்ளிட்ட முக்கிய நிர்வாகிகள் பங்கேற்று ஆலோசனை நடத்தினர். இந்தக் கூட்டத்தைத் தொடர்ந்து, இன்று முதல் கட்ட வேட்பாளர் பட்டியல் அதிகாரப்பூர்வமாக வெளியிடப்பட்டது. இதில் மொத்தம் 40 சட்டமன்ற தொகுதிகளுக்கான வேட்பாளர்களின் பெயர்கள் இடம்பெற்றுள்ளன. குறிப்பாக, பகவந்த் மான் மீண்டும் தனது சொந்த தொகுதியான துரியில் களம் காண உள்ளார். ஆம் ஆத்மி கட்சியின் உயர்மட்ட அரசியல் விவகாரக் குழுக் கூட்டத்தில் ஆலோசனை நடத்தப்பட்ட பின்னரே வேட்பாளர் பட்டியல் இறுதி செய்யப்பட்டு வெளியிடப்பட்டதாக பகவந்த் மான் தெரிவித்துள்ளார். தேர்தல் தேதிக்கான அதிகாரப்பூர்வ அறிவிப்பு வெளியாகும் முன்பே வேட்பாளர்களை அறிவித்துள்ள ஆம் ஆத்மி கட்சியின் நடவடிக்கை, பஞ்சாப் அரசியல் வட்டாரத்தில் கவனத்தைப் பெற்றுள்ளது.
