படம் தயாராகிறது… Generating image…
திருப்பூர் மாவட்டத்தில் நொய்யல் ஆற்றில் மீண்டும் வெள்ளப்பெருக்கு ஏற்பட்டுள்ளதால், அணைப்பாளையம் தரைப்பாலம் வெள்ளத்தில் மூழ்கி போக்குவரத்து பாதிக்கப்பட்டுள்ளது. திருப்பூர் மாநகர் மற்றும் அதன் நீர்ப்பிடிப்புப் பகுதிகளில் நேற்று (ஞாயிற்றுக்கிழமை) பெய்த கனமழையின் காரணமாக, இன்று (திங்கட்கிழமை) காலை நொய்யல் ஆற்றில் திடீரென வெள்ளநீர் பெருக்கெடுத்து ஓடியது. இதனால் அணைப்பாளையம் பகுதியில் அமைந்துள்ள தரைப்பாலம் முழுவதுமாக நீரில் மூழ்கியது. மங்கலம் சாலை மற்றும் கல்லூரி சாலையை இணைக்கும் முக்கிய வழித்தடமாக இந்தப் பாலம் இருப்பதால், அது நீரில் மூழ்கியதைத் தொடர்ந்து அப்பகுதியில் போக்குவரத்து முற்றிலும் துண்டிக்கப்பட்டுள்ளது. இதனால் வாகன ஓட்டிகளும் பொதுமக்களும் பெரும் சிரமத்திற்கு ஆளாகியுள்ளனர். முன்னெச்சரிக்கை நடவடிக்கையாக, அப்பகுதியில் போலீசாரும் அதிகாரிகளும் பாதுகாப்புப் பணிகளிலும் கண்காணிப்பிலும் ஈடுபட்டு வருகின்றனர். ஏற்கெனவே அக்டோபர் 16 மற்றும் 23 ஆகிய தேதிகளில் பெய்த கனமழையால் இந்தத் தரைப்பாலம் வெள்ளத்தில் மூழ்கியது. இந்நிலையில், இன்று மூன்றாவது முறையாக மீண்டும் வெள்ளப்பெருக்கு ஏற்பட்டு பாலம் மூழ்கியுள்ளது. மேலும், ஆற்றில் பெருக்கெடுத்து ஓடும் வெள்ளநீருடன் நகரின் கழிவுநீரும் கலந்து கருமை நிறத்தில் ஓடுகிறது. இதையடுத்து, அப்பகுதியில் போக்குவரத்து மாற்றுப் பாதைகள் வழியாகத் திருப்பி விடப்பட்டுள்ளது.
