படம் தயாராகிறது… Generating image…
சனி, ஞாயிறு ஆகிய இரு நாட்களிலும் விடுமுறை வழங்க வேண்டும் என்பது உள்ளிட்ட பல்வேறு கோரிக்கைகளை வலியுறுத்தி, நாடு முழுவதும் சுமார் 8½ லட்சம் வங்கி ஊழியர்கள் இன்று வேலைநிறுத்தப் போராட்டத்தில் ஈடுபட உள்ளதாக வங்கி ஊழியர் சங்கங்களின் ஐக்கிய முன்னணி அறிவித்துள்ளது. இதுகுறித்து சென்னை பத்திரிகையாளர் மன்றத்தில் செய்தியாளர்களிடம் பேசிய வங்கி ஊழியர் சங்கங்களின் ஐக்கிய முன்னணி ஒருங்கிணைப்பாளரும், அகில இந்திய வங்கி ஊழியர் சங்கத்தின் பொதுச்செயலாளருமான எச். வெங்கடாசலம் கூறியதாவது: வங்கி ஊழியர்களின் நீண்டகால கோரிக்கைகளில் ஒன்றான அனைத்து சனிக்கிழமைகளிலும் விடுமுறை வழங்கும் கோரிக்கையை மத்திய அரசு தொடர்ந்து தாமதப்படுத்தி வருகிறது. சனி, ஞாயிறு என வாரத்தில் இரு நாட்கள் விடுமுறை அளிக்கப்பட்டால், அதற்கு பதிலாக வாடிக்கையாளர்களுக்கான வங்கி சேவை நேரத்தை தினமும் கூடுதலாக 40 நிமிடங்கள் நீட்டித்து பணியாற்ற தயாராக இருப்பதாக மத்திய அரசிடம் தெரிவிக்கப்பட்டுள்ளது. ஆனால், 2½ ஆண்டுகளுக்கும் மேலாக இந்த விவகாரம் நிதி அமைச்சகத்தின் பரிசீலனையில் நிலுவையில் உள்ளது. பேச்சுவார்த்தை மூலம் பிரச்சினைக்கு தீர்வு காண வேண்டும் என அரசுக்கு நோட்டீஸ் வழங்கப்பட்டபோதிலும், இதுவரை நடவடிக்கை எடுக்கப்படவில்லை. இதனால், வேறு வழியின்றி வேலைநிறுத்தப் போராட்டத்தை நடத்த வேண்டிய நிலைக்கு வங்கி ஊழியர்கள் தள்ளப்பட்டுள்ளனர். மேலும், வங்கிகளில் எழுத்தர் மற்றும் துணை ஊழியர்களின் பணியிடங்களை போதிய அளவில் நிரப்ப வேண்டும், தேசிய ஓய்வூதியத் திட்டத்தை மீண்டும் பழைய ஓய்வூதியத் திட்டமாக மாற்ற வேண்டும், பணிக்கொடைக்கான உச்சவரம்பை உயர்த்த வேண்டும் என்பன உள்ளிட்ட கோரிக்கைகளும் முன்வைக்கப்பட்டுள்ளன. அதேபோல், வங்கிகளில் தொழிலாளர் மற்றும் அதிகாரி இயக்குனர் பதவிகளை நிரப்பாமல் இருப்பதற்கும் எதிர்ப்பு தெரிவிக்கப்பட்டுள்ளது. இந்த கோரிக்கைகளை வலியுறுத்தி நாடு முழுவதும் சுமார் 8½ லட்சம் வங்கி ஊழியர்கள் இன்று நடைபெறும் வேலைநிறுத்தத்தில் பங்கேற்க உள்ளதாக தெரிவிக்கப்பட்டுள்ளது.
