படம் தயாராகிறது… Generating image…
தியாகதீபம் திலீபனின் நினைவுச் சின்னம் அகற்றப்பட்டாலும், அவரை தமிழர்களின் நினைவிலிருந்து ஒருபோதும் அகற்ற முடியாது என தமிழக வாழ்வுரிமைக் கட்சி தலைவர் வேல்முருகன் தெரிவித்துள்ளார். இதுதொடர்பாக அவர் தனது எக்ஸ் தளத்தில் வெளியிட்ட பதிவில் கூறியிருப்பதாவது: தமிழர்களின் உரிமைகளுக்காக உயிரைத் தியாகம் செய்த திலீபனின் 39-வது ஆண்டு நினைவேந்தல் நிகழ்ச்சிகள் இலங்கை யாழ்ப்பாணம் நல்லூரில் நடைபெற்றன. இந்த நிலையில், அவரது நினைவிடத்தில் அமைக்கப்பட்டிருந்த சிலையை இலங்கை காவல்துறையினர் அகற்றியிருப்பது கண்டனத்துக்குரியது. கடந்த 1987-ம் ஆண்டு செப்டம்பர் 15-ந் தேதி நல்லூரில் திலீபன் உண்ணாவிரதப் போராட்டத்தை தொடங்கினார். தமிழர்களின் உரிமைகள் தொடர்பான கோரிக்கைகளை வலியுறுத்தி உணவு, தண்ணீர் எதையும் உட்கொள்ளாமல் 12 நாட்கள் போராடிய அவர், செப்டம்பர் 26-ந் தேதி உயிரிழந்தார். 1987 இந்தியா-இலங்கை ஒப்பந்தத்துக்குப் பின்னர் தமிழர்களுக்கு அளிக்கப்பட்ட உறுதிமொழிகளை நடைமுறைப்படுத்த வேண்டும் என்ற கோரிக்கைகளும் அவரது போராட்டத்தின் பின்னணியில் இடம்பெற்றிருந்தன. தமிழர்களின் பூர்வீக நிலமாகக் கருதப்படும் தமிழ் ஈழத்தில், வரலாற்று தியாகியை நினைவுகூருவதற்கே தொடர்ந்து கட்டுப்பாடுகள் விதிக்கப்படுவது கவலை அளிக்கிறது. உலகின் பல்வேறு நாடுகளில் வாழும் தமிழர்கள் திலீபனுக்கு நினைவேந்தல் நிகழ்ச்சிகளை நடத்தி வரும் நிலையில், அவரது சொந்த மண்ணில் நினைவுச் சின்னம் அகற்றப்பட்டிருப்பது, ஈழத் தமிழர்களின் நினைவேந்தல் உள்ளிட்ட அடிப்படை உரிமைகள் இன்னும் முழுமையாக உறுதி செய்யப்படவில்லை என்பதையே காட்டுகிறது. தமிழர்களின் வரலாற்றையும் தியாகங்களையும் அழிக்கும் எந்த நடவடிக்கையையும் ஏற்க முடியாது. திலீபனின் நினைவேந்தலை பாதிக்கும் இந்த நடவடிக்கைக்கு தமிழக வாழ்வுரிமைக் கட்சி சார்பில் கடும் கண்டனத்தை தெரிவித்துக் கொள்கிறோம். உலகம் முழுவதும் வாழும் தமிழர்கள் இந்த நடவடிக்கைக்கு கண்டனம் தெரிவிக்க வேண்டும். தமிழ்நாட்டு மக்களுக்கும் ஈழத் தமிழர்களுக்கும் இடையேயான உறவை கருத்தில் கொண்டு, தமிழக அரசும் இலங்கை அரசின் இந்த நடவடிக்கைக்கு கண்டனம் தெரிவிக்க வேண்டும். இந்திய அரசை எதிர்நோக்கி திலீபன் மேற்கொண்ட போராட்டம் மற்றும் 1987 இந்தியா-இலங்கை ஒப்பந்தத்தின் பின்னணியை கருத்தில் கொண்டு, இந்திய ஒன்றிய அரசும் இந்த விவகாரத்தில் மவுனம் காக்காமல் இலங்கை அரசிடம் தனது கண்டனத்தை பதிவு செய்ய வேண்டும். தமிழ்நாட்டு மக்களின் உணர்வுகளுக்கும் ஈழத் தமிழர்களின் உரிமைகளுக்கும் மதிப்பளிக்கும் வகையில் இந்திய அரசின் நடவடிக்கைகள் இருக்க வேண்டும். மேலும், சிலை அகற்றப்பட்டதற்கான காரணம் குறித்து இலங்கை அரசு வெளிப்படையான விளக்கத்தை அளிப்பதுடன், தமிழர்களின் அமைதியான நினைவேந்தல் உரிமையையும் உறுதி செய்ய வேண்டும். நினைவுச் சின்னத்தை அகற்ற முடியும். ஆனால், தியாகதீபம் திலீபனை தமிழர்களின் நினைவிலிருந்து அகற்ற முடியாது. தமிழர்களின் உரிமைக்காக உயிரை ஈந்த அவரது தியாகத்தை உலகத் தமிழர்கள் தொடர்ந்து நினைவுகூர்வார்கள். தமிழர்களின் நினைவேந்தல் உரிமை பாதுகாக்கப்பட வேண்டும் என்றும், ஈழத் தமிழர்களின் உரிமைகள் முழுமையாக உறுதி செய்யப்பட வேண்டும் என்றும் தமிழக வாழ்வுரிமைக் கட்சி சார்பில் வலியுறுத்துகிறேன். இவ்வாறு வேல்முருகன் தெரிவித்துள்ளார்.
