படம் தயாராகிறது… Generating image…
திண்டுக்கல் மாவட்டம் நத்தம் அருகேயுள்ள உலுப்பகுடி பகுதியில் செயல்பட்டு வரும் தனியார் தென்னை நார் குடோனில் செவ்வாய்க்கிழமை திடீரென ஏற்பட்ட தீ விபத்து பரபரப்பை ஏற்படுத்தியது.வழக்கம்போல குடோனில் பணிகள் நடைபெற்று கொண்டிருந்த நிலையில், ஒரு பகுதியில் திடீரென புகை எழுந்து சில நொடிகளில் தீ பரவியது. குடோனில் அதிகளவில் தேங்காய் நார் கழிவுகள் இருந்ததால், தீ வேகமாக பரவி முழு கட்டிடத்தையும் சூழ்ந்தது. இதைக் கண்ட தொழிலாளர்கள் உடனடியாக வெளியேறி தப்பினர்.சம்பவம் குறித்து தகவல் கிடைத்ததும் நத்தம் தீயணைப்பு நிலைய வீரர்கள் விரைந்து வந்து தீயை அணைக்கும் பணியில் ஈடுபட்டனர். பலத்த காற்று வீசியதால் தீயைக் கட்டுப்படுத்துவதில் ஆரம்பத்தில் சிரமம் ஏற்பட்டது. இருப்பினும், சுமார் ஒரு மணி நேரம் தொடர்ந்து போராடிய தீயணைப்பு வீரர்கள் தீயை முழுமையாக அணைத்து கட்டுக்குள் கொண்டு வந்தனர். இந்த விபத்தில் யாருக்கும் உயிரிழப்போ அல்லது காயமோ ஏற்படாதது நிம்மதியை ஏற்படுத்தியது. எனினும், குடோனில் குவிக்கப்பட்டிருந்த அதிகளவிலான தேங்காய் நார் கழிவுகள் மற்றும் இரண்டு இயந்திரங்கள் தீயில் எரிந்து சேதமடைந்தன. இதன் சேத மதிப்பு சுமார் ரூ.10 லட்சம் இருக்கும் என முதற்கட்ட தகவல்கள் தெரிவிக்கின்றன. இந்த சம்பவம் தொடர்பாக நத்தம் போலீசார் வழக்குப்பதிவு செய்து விசாரணை மேற்கொண்டுள்ளனர். மின் கசிவு காரணமாக தீ விபத்து ஏற்பட்டதா அல்லது வேறு ஏதேனும் காரணம் உள்ளதா என்பது குறித்து பல்வேறு கோணங்களில் விசாரணை நடைபெற்று வருகிறது. இந்த சம்பவம் அந்தப் பகுதியில் பரபரப்பை ஏற்படுத்தியுள்ளது.
