தேனி தேக்கம்பட்டி சிறையில் 16 கைதிகள் தப்பியோட்டம்:

தேக்கம்பட்டி சிறையில் நாடகமாடி காவலர்களைத் தாக்கிவிட்டு 16 கைதிகள் தப்பியோட்டம்: படுகாயமடைந்த காவலர்களுக்கு தீவிர சிகிச்சை! கண்டமனூர்: கண்டமனூர் அருகே உள்ள தேக்கம்பட்டி சிறைச்சாலையில், நேற்று இரவு சிறைக் காவலர்களைக் கொடூரமாகத் தாக்கிவிட்டு சுமார் 16 கைதிகள் தப்பியோடியுள்ள சம்பவம் பெரும் பரபரப்பையும் அதிர்ச்சியையும் ஏற்படுத்தியுள்ளது. திட்டமிட்டு நாடகமாடிய கைதிகள்: நேற்று இரவு சிறையில் அடைக்கப்பட்டிருந்த கைதிகளில் சிலர் தங்களுக்குள் பயங்கரமாக மோதிக்கொள்வது போலவும், ஒருவரையொருவர் தாக்கிக் கொண்டு பலத்த காயமடைந்தது போலவும் அலறல் சத்தத்தை எழுப்பியுள்ளனர். சிறைக்குள் அசாதாரண அவசர சூழல் ஏற்பட்டுள்ளது எனப் பதறியடித்த சிறைக் காவலர்கள், நிலைமையைக் கட்டுப்படுத்த உடனடியாக சிறை அறைக் கதவைத் திறந்து உள்ளே சென்றுள்ளனர். காவலர்கள் மீது தாக்குதல் - 16 பேர் தப்பியோட்டம்: காவலர்கள் உள்ளே நுழைந்த அடுத்த கணமே, அவர்கள் சற்றும் எதிர்பாராத வகையில் கைதிகள் ஒன்றுசேர்ந்து காவலர்களைக் கடுமையாகத் தாக்கியுள்ளனர். காவலர்களை நிலைகுலையச் செய்து கீழே தள்ளிவிட்டு, சிறை வளாகத்திலிருந்து சுமாராக 16 கைதிகள் இருளைப் பயன்படுத்தித் தப்பியோடியுள்ளனர். மருத்துவமனையில் காவலர்கள் அனுமதி: இந்தத் திடீர் தாக்குதலில், பாதுகாப்புப் பணியில் ஈடுபட்டிருந்த சின்னமனூரைச் சேர்ந்த காவலர்கள் மதன், தங்கபாண்டியன் உட்பட பல காவலர்கள் பலத்த காயமடைந்தனர். அலறல் சத்தம் கேட்டு ஓடிவந்த சக காவலர்கள், மீட்டு, உடனடியாக சிகிச்சைக்காக கானாவிலக்கு அரசு மருத்துவக் கல்லூரி மருத்துவமனையில் அனுமதித்தனர். அங்கு அவர்களுக்கு மருத்துவர்கள் தீவிர சிகிச்சை அளித்து வருகின்றனர். தீவிர தேடுதல் வேட்டை: இச்சம்பவம் குறித்து வழக்குப் பதிவு செய்துள்ள காவல்துறையினர், தேக்கம்பட்டி மற்றும் அதன் சுற்றுவட்டாரப் பகுதிகளில் பாதுகாப்பு வளையத்தை தீவிரப்படுத்தியுள்ளனர். தப்பியோடிய 16 கைதிகளையும் பிடிக்க தனிப்படைகள் அமைக்கப்பட்டு தீவிர தேடுதல் வேட்டை முடுக்கிவிடப்பட்டுள்ளது. சிறைக் காவலர்களைத் தாக்கிவிட்டு கைதிகள் தப்பியோடிய இச்சம்பவம் அப்பகுதியில் பெரும் பதற்றத்தை உருவாக்கியுள்ளது