படம் தயாராகிறது… Generating image…
நாடு முழுவதும் தீபாவளி பண்டிகை நாளை (ஞாயிற்றுக்கிழமை) கொண்டாடப்பட உள்ளது. பண்டிகையை குடும்பத்தினருடன் சொந்த ஊரில் கொண்டாடுவதற்காக பலரும் பயணம் மேற்கொண்டு வருகின்றனர். இதையொட்டி, தமிழக அரசு சனிக்கிழமை, ஞாயிற்றுக்கிழமை, திங்கட்கிழமை என தொடர்ந்து 3 நாட்கள் விடுமுறை அறிவித்துள்ளது. இந்த தொடர் விடுமுறையை பயன்படுத்தி, சென்னை, கோவை, பெங்களூரு உள்ளிட்ட நகரங்களில் வசித்து வருபவர்கள் தீபாவளியைக் கொண்டாடுவதற்காக மதுரைக்கு வந்துள்ளனர். அதேபோல், மதுரையில் வசிக்கும் வெளிமாவட்டங்களைச் சேர்ந்தவர்களும் தங்களது சொந்த ஊர்களுக்குப் புறப்பட்டனர். இதனால், மதுரையில் உள்ள ரெயில் மற்றும் பஸ் நிலையங்களில் நேற்று பயணிகளின் கூட்டம் அதிகரித்துக் காணப்பட்டது. பள்ளி, கல்லூரிகள் வழக்கம்போல் செயல்பட்டதால், காலையைக் காட்டிலும் மாலை நேரத்தில் பயணிகள் வருகை அதிகமாக இருந்தது. குழந்தைகளுடன் குடும்பம் குடும்பமாக வந்தவர்கள், பெரிய அளவிலான பயணப் பைகளுடன் தங்களது பயணத்திற்காக காத்திருந்தனர். ரெயில் நிலையத்தில் கட்டுக்கடங்காத கூட்டம் தீபாவளி போன்ற பண்டிகைக் காலங்களில் மதுரை ரெயில் நிலையத்தில் பயணிகள் கூட்டம் அதிகமாக இருக்கும். அந்த வகையில், நேற்றும் வழக்கத்தைவிட அதிகமான மக்கள் திரண்டனர். குறிப்பாக, முன்பதிவில்லாத ரெயில் பெட்டிகளில் கூட்டம் நிரம்பி வழிந்தது. சொந்த ஊர்களுக்குச் செல்ல வேண்டும் என்ற ஆர்வத்தில், இருக்கைகளைப் பிடிப்பதற்காக பயணிகள் ஒருவருக்கொருவர் போட்டிபோட்டு ரெயில்களில் ஏறினர். வடமாவட்டங்கள் மற்றும் தென்மாவட்டங்களுக்குச் செல்லும் ரெயில்களில் ஏராளமானோர் பயணம் மேற்கொண்டனர். சிறப்பு பஸ்கள் இயக்கம் ரெயில் நிலையத்தைப் போலவே, மதுரை மாட்டுத்தாவணி, ஆம்னி பஸ் நிலையம், ஆரப்பாளையம் உள்ளிட்ட பஸ் நிலையங்களிலும் பயணிகள் கூட்டம் அதிகமாக இருந்தது. பயணிகளின் தேவையைக் கருத்தில் கொண்டு, மதுரையில் இருந்து பல்வேறு பகுதிகளுக்கு வழக்கமான எண்ணிக்கையைவிட கூடுதல் சிறப்பு பஸ்கள் இயக்கப்பட்டன. இருப்பினும், பஸ் நிலையங்களில் மக்கள் கூட்டம் குறையவில்லை. குடும்பத்தினருடன் தீபாவளியைக் கொண்டாடும் நோக்கில் ஏராளமானோர் சொந்த ஊர்களுக்குப் பயணம் செய்தனர். இதற்கிடையே, சில ஆம்னி பஸ்களில் கூடுதல் கட்டணம் வசூலிக்கப்படுவதாக புகார்கள் எழுந்தன. இதுகுறித்து சம்பந்தப்பட்ட அதிகாரிகள் உரிய நடவடிக்கை எடுக்க வேண்டும் என பயணிகள் கோரிக்கை விடுத்துள்ளனர்.
