படம் தயாராகிறது… Generating image…
திருமலை திருப்பதி ஏழுமலையான் கோவிலில் பக்தர்களின் வருகை தொடர்ந்து அதிகரித்து வருவதால், இலவச தரிசனத்துக்கான காத்திருப்பு நேரமும் கணிசமாக உயர்ந்துள்ளது. டைம் ஸ்லாட் டோக்கன் இல்லாமல் வரும் பக்தர்கள் சுமார் 24 மணி நேரம் வரை காத்திருக்க வேண்டிய நிலை ஏற்பட்டுள்ளதாக கோவில் அதிகாரிகள் தெரிவித்துள்ளனர். திருப்பதி கோவிலில் தினமும் சராசரியாக 75 ஆயிரம் முதல் 80 ஆயிரம் பக்தர்கள் வரை சாமி தரிசனம் செய்து வருகின்றனர். இதனால் வைகுண்டம் கியூ காம்ப்ளக்சில் உள்ள காத்திருப்பு அறைகளில் பெரும்பாலானவை நிரம்புகின்றன. தேதி மற்றும் நேரம் குறிப்பிடப்பட்ட டைம் ஸ்லாட் டோக்கன் பெறாமல் நேரடியாக இலவச தரிசனத்துக்கு வரும் பக்தர்கள் வழக்கமாக 8 முதல் 12 மணி நேரம் வரை காத்திருக்க வேண்டியுள்ளது. விடுமுறை நாட்களில் இந்த காத்திருப்பு 20 முதல் 24 மணி நேரம் வரை நீடிப்பதாக தெரிவிக்கப்பட்டுள்ளது. முன்தினம் 77,670 பக்தர்கள் ஏழுமலையானை தரிசனம் செய்தனர். 33,904 பேர் தலைமுடி காணிக்கை செலுத்தினர். அன்றைய தினம் 4 கோடியே 59 ஆயிரம் லட்டுகள் விற்பனை செய்யப்பட்டன. மேலும், 3 லட்சத்து 4 ஆயிரம் பக்தர்கள் அன்னப்பிரசாதம் பெற்றனர். திருமலை அஸ்வினி மருத்துவமனையில் 3,932 பேர் சிகிச்சை பெற்றனர். நேற்றைய நிலவரப்படி, வைகுண்டம் கியூ காம்ப்ளக்சில் உள்ள 31 காத்திருப்பு அறைகளும் பக்தர்களால் நிரம்பின. இதையடுத்து பாதகங்கையம்மன் கோவில் வரை வெளியிலும் நீண்ட வரிசையில் பக்தர்கள் காத்திருந்தனர். இதனிடையே, அலிபிரி டோல்கேட்டில் வாகனங்கள் தீவிரமாக சோதனை செய்யப்பட்டன. டைம் ஸ்லாட் டோக்கன் இல்லாமல் இலவச தரிசனம் மேற்கொள்ள சுமார் 24 மணி நேரம் வரை காத்திருக்க வேண்டியுள்ளதாக கோவில் அதிகாரிகள் தெரிவித்தனர். நேற்று 69,771 பக்தர்கள் ஏழுமலையானை தரிசனம் செய்தனர். 25,888 பக்தர்கள் தலைமுடி காணிக்கை செலுத்தினர். 4 கோடியே 42 ஆயிரம் லட்டுகள் விற்பனை செய்யப்பட்ட நிலையில், 2 லட்சத்து 65 ஆயிரம் பக்தர்கள் அன்னப்பிரசாதம் பெற்றனர். திருமலை அஸ்வினி மருத்துவமனையில் 4,091 பேர் சிகிச்சை பெற்றனர். இன்று காலை நிலவரத்தின்படி, வைகுண்டம் கியூ காம்ப்ளக்சில் உள்ள 31 காத்திருப்பு அறைகளிலும் பக்தர்கள் நிரம்பியிருந்தனர். இதனால் சிலாதோரணம் வெளியே வரையிலும் நீண்ட வரிசை காணப்பட்டது. டைம் ஸ்லாட் டோக்கன் இல்லாமல் இலவச தரிசனம் செய்ய வரும் பக்தர்கள் சுமார் 20 மணி நேரம் வரை காத்திருக்க வேண்டியிருக்கலாம் என எதிர்பார்க்கப்படுகிறது. இதற்கிடையே, நாளை முதல் 14-ம் தேதி வரை தொடர் விடுமுறை நாட்கள் என்பதால் திருமலைக்கு வரும் பக்தர்களின் எண்ணிக்கை மேலும் அதிகரிக்கும் என எதிர்பார்க்கப்படுகிறது. இதையடுத்து, வரும் 13-ம் தேதி ஞாயிற்றுக்கிழமை நடைபெறவிருந்த விஐபி பிரேக் தரிசனம் ரத்து செய்யப்பட்டுள்ளது. இதன் காரணமாக, நாளை சனிக்கிழமை விஐபி பிரேக் தரிசனத்துக்கான பரிந்துரைக் கடிதங்கள் ஏற்றுக்கொள்ளப்படாது என தெரிவிக்கப்பட்டுள்ளது. ஞாயிற்றுக்கிழமை ரத்து செய்யப்பட்ட விஐபி பிரேக் தரிசனத்துக்காக ஒதுக்கப்பட்ட நேரம், பொது பக்தர்களுக்கு தரிசனம் வழங்க பயன்படுத்தப்பட உள்ளது. எனவே, இந்த மாற்றத்தை கருத்தில் கொண்டு பக்தர்கள் ஒத்துழைக்குமாறு திருமலை திருப்பதி தேவஸ்தானம் கேட்டுக்கொண்டுள்ளது.
