படம் தயாராகிறது… Generating image…
திருப்பூர் மாவட்டம் தாராபுரம் சட்டமன்றத் தொகுதிக்கான இடைத்தேர்தல் பிரசாரம் இறுதிக்கட்டத்தை எட்டியுள்ள நிலையில், தமிழக வெற்றிக் கழக வேட்பாளர் பி. சத்யபாமாவுக்கு ஆதரவாக மதுரை மத்தி தொகுதி எம்.எல்.ஏ. முஸ்தபா வித்தியாசமான முறையில் வாக்கு சேகரிப்பில் ஈடுபட்டார். அதிமுகவில் இருந்து விலகி தமிழக வெற்றிக் கழகத்தில் இணைந்த சத்யபாமா, தனது எம்.எல்.ஏ. பதவியை ராஜினாமா செய்ததைத் தொடர்ந்து தாராபுரம் தொகுதி காலியானது. இதையடுத்து வரும் அக்டோபர் 6-ஆம் தேதி இடைத்தேர்தல் நடைபெறுகிறது. இதில் தவெக சார்பில் பி. சத்யபாமா வேட்பாளராக போட்டியிடுகிறார். அவருக்கு ஆதரவாக தவெக முக்கிய நிர்வாகிகள் தாராபுரம் பகுதியில் முகாமிட்டு தீவிரமாக வாக்கு சேகரித்து வருகின்றனர். அதன் ஒரு பகுதியாக, மதுரை மத்தி தொகுதி எம்.எல்.ஏ. முஸ்தபா இன்று (வியாழக்கிழமை) தாராபுரத்தில் உள்ள சலூன் ஒன்றில் நூதன முறையில் பிரசாரம் மேற்கொண்டார். சலூனுக்குச் சென்ற முஸ்தபா, அங்கிருந்த பொதுமக்களிடம் தவெக தேர்தல் அறிக்கை தொடர்பான நோட்டீஸ்களை வழங்கினார். பின்னர் சலூன் ஊழியரிடம் இருந்து கத்தரி மற்றும் சீப்பை வாங்கிய அவர், அங்கு முடி திருத்தம் செய்துகொண்டிருந்த வாடிக்கையாளர் ஒருவருக்கு தானே முடி வெட்டினார். இதைத்தொடர்ந்து சலூன் உரிமையாளர் மற்றும் அங்கிருந்த வாக்காளர்களிடம் பேசிய முஸ்தபா, தவெக வேட்பாளர் சத்யபாமாவுக்கு ஆதரவாகவும், கட்சியின் ‘விசில்’ சின்னத்துக்கு வாக்களிக்குமாறும் கேட்டுக்கொண்டார். முஸ்தபாவின் இந்த வித்தியாசமான பிரசாரம் தாராபுரம் பகுதி மக்களின் கவனத்தை ஈர்த்துள்ளது. அக்டோபர் 4-ஆம் தேதியுடன் தேர்தல் பிரசாரம் நிறைவடைய உள்ள நிலையில், தவெகவினர் தங்களது களப்பணிகளை தீவிரப்படுத்தியுள்ளனர்.
