தாய்லாந்து ராணி சுதிடா தனியாகப் போர் விமானத்தை இயக்கி உலக சாதனை!

தாய்லாந்து ராணி சுதிடா, ஒற்றை இருக்கை கொண்ட போர் விமானத்தைத் தனியாக இயக்கிப் பறந்து புதிய உலக சாதனையைப் படைத்துள்ளார். இதன் மூலம், போர் விமானத்தைத் தனியாக இயக்கிய முதல் ஆளும் ராணி என்ற பெருமையை அவர் பெற்றுள்ளதாகத் தெரிவிக்கப்பட்டுள்ளது. தாய்லாந்தின் சூரத் தானி மாகாணத்தில் அமைந்துள்ள 'விங் 7' ராயல் தாய்லாந்து விமானப்படைத் தளத்தில், வியாழக்கிழமை ராணி சுதிடா இந்தச் சாதனைப் பயணத்தை மேற்கொண்டார். சுவீடனில் தயாரிக்கப்பட்ட நவீன தொழில்நுட்ப வசதிகளைக் கொண்ட ஒற்றை இருக்கை உடைய 'ஜேஏஎஸ் 39சி கிரிபென்' (JAS 39C Gripen) போர் விமானத்தை அவர் வெற்றிகரமாகத் தனியாக இயக்கிப் பறந்தார். இந்தப் பயணத்திற்காக ராணி சுதிடா முன்கூட்டியே தீவிரமாகத் தயாராகியிருந்தார். ராயல் தாய்லாந்து விமானப்படையின் வழிகாட்டுதலுடன் சிமுலேட்டர் பயிற்சிகளைப் பெற்றதுடன், இரண்டு பேர் பயணிக்கக்கூடிய கிரிபென் டி ரக விமானத்தில் சுமார் 10 மணி நேரம் பறத்தல் பயிற்சியையும் அவர் மேற்கொண்டார். ராணியின் இந்தச் சாதனைப் பயணத்தை அவரது கணவரும் தாய்லாந்து மன்னருமான மகா வஜிரலோங்கோர்ன் தரையில் இருந்து நேரில் பார்வையிட்டார். விமானத்தைப் பாதுகாப்பாகத் தரையிறக்கிய ராணியை மலர்க்கொத்து வழங்கி மன்னர் பாராட்டினார். மேலும், விமானிகளுக்கு வழங்கப்படும் புகழ்பெற்ற 'கிரிப்பன் ஆர்டர் கோல்டன் பேட்ச்' சின்னத்தையும் வழங்கி அவரைக் கவுரவித்தார். ராணி சுதிடாவுக்கு விமானப் போக்குவரத்துத் துறையில் ஏற்கெனவே அனுபவம் உள்ளது. கடந்த 2019-ஆம் ஆண்டு தாய்லாந்து ராணியாகப் பொறுப்பேற்பதற்கு முன்பு, அவர் தாய் ஏர்வேஸ் நிறுவனத்தில் விமானப் பணிப்பெண்ணாகப் பணியாற்றினார். 2010-ஆம் ஆண்டு முதல் விமானம் இயக்குவதற்கான பயிற்சியில் ஈடுபட்டு வந்த அவர், போயிங் 737 உள்ளிட்ட பல்வேறு விமானங்களில் 1,188 மணி நேரத்திற்கும் அதிகமாகப் பறந்த அனுபவம் பெற்றுள்ளார். அத்துடன், அரச குடும்பத்துக்குச் சொந்தமான விமானங்களில் பலமுறை துணை விமானியாகவும் அவர் பணியாற்றியுள்ளார். இந்நிலையில், ராணி சுதிடாவின் இந்தச் சாதனை, பாதுகாப்புத் துறை மற்றும் விமானப் போக்குவரத்துத் துறையில் சாதிக்க விரும்பும் பெண்களுக்கு ஊக்கமளிக்கும் முன்னுதாரணமாகப் பார்க்கப்படுகிறது.